Pissusitoqqaminnik qaangiinikut inunnik allanik ikiuisinnaapput

Inooqatigiinnut tunngasunut ilisimasalik Else Christensen misissuinermik aqutsisuussaaq, meeqqat inuttut ajornartorsiuteqaraluarlutik pissusitoqqaminnik suna pissutigalugu allanngortitsarnersut misissuiffigissagamiuk.

Meeqqat "Mælkebøtten"-imiittartut 60-it ilisimatuunit ukiuni qulingiluani malittarineqassapput.

Meeqqat Kalaallit Nunaanniittut amerlasuut ajornartorsiuteqartut, Else Christensenip misissuinermini siornatigut saqqummiutereerpaa, suliniullu "Meeraanermi ajornartorsiuteqarnermiit pissusitoqqanik allanngortitsisumut" tassaavoq ajornartorsiutilinnik ikiuiniarneq, Else Christensen oqarpoq, misissuinerullu sapinngisamik kalaallisuujunissaa anguniagaavoq:

Pissusitoqqanik allanngortitsisartut misissorneqarnerisigut suut pitsaaqutaanersut paasiniarneqarpoq:

- Meeqqat Kalaallit Nunaanniittut qitiutinneqassapput, Kalaallit Nunaannilu ajornartorsiutit immikkut ittumik misissuiffigineqassallutik. Sullissisut angajoqqaallu oqallinnerannut aamma tapertaassaaq:

- Ajornartorsiutit qaangerniarlugit iliuusissat pitsaasut pingaartissavavut, inuimmi ajornartorsiutitik qaangerniassavaat. Siunissaq eqqarsaatigalugu inuiaqatigiinnut aamma iluaqutaassaaq suut ajornartorsiutaasinnaanersut paasisinnaagutsigu, Else Christensen oqarpoq.

Pissusitoqqaminik allanngortitsisimasoq Inge Olsvig Brandt ullumikkut namminersortuuvoq.

Angajoqqaajusup imigassartortuunera pissutigalugu peroriartornermini ajornartorsiuteqarpoq, pissusitoqqalli allanngortinnerisigut inersimasunngornermi tamakku qaangerpai:

- Meeraaninni nuannerpallaanngitsunik misigisaqaraluarlunga, angerlarsimaffiimmiinnaanngitsoq, avataaninngaanniilli asaneqartutut aamma misigisaqartinneqartarnera pingaruteqartorujussuartut isigaara. Inunnik inersimasunik maligassiuisunik takusaqartarneq aamma pingaartippara, soorlu aamma nuannerpallaanngikkaluanik misigisaqartarnikuugaluarlunga inuunermi upperinninneq pingaartippara, pissusitoqqaminik allanngortitsisimasoq Inge Olsvig Brandt oqarpoq.