Pissatat annertussusaat misissorneqalerpoq
Arferit, aarrit puisillu pissatat annertussusaat paasiniarneqarlunilu annikillisarniarneqalerpoq. Atlantikup Avannaani miluumasut imarmiut pillugu Kommissionip, naalisarlugu NAMMCO-mik taaguutillip, piniariaatsinut tunngasunut ataatsimiititaliaata tamanna innersuussutigaa.
Piniartut, ilisimatuut ingerlatsinermilu suliallit ikioqatigiillutik nakkutiginninnissamut atugassamik pilersaarusiussasut ataatsimiititaliamit innersuussutigineqarpoq.
Innersuussutigineqarportaaq apriilimiit juulip tungaanut puisit piniagaajunnaarallartarnissaat piffissamimi tassani puisit aqqarnerpaaffigisarmassuk. Taamatuttaaq siunnersuutigineqarpoq piniutit nutaat saqqummeraangata piniartut malinnaatinneqaqqissaartarnissaat.
- Pissatat pillugit eqqortumik nalunaarusiortoqartalerpat, taava aamma taamaalilluni ingerlatsisut piniartunut akissuteqartarnerat pitsaanerulissaaq, ataatsimiititaliaq tusagassiuutinut nalunaarummini taama allagaqarpoq.
Piniartut, kiisalu ingerlatsinermi suliallit ilisimatuullu 50-it missaanniittut, nunallu arfanniarfiusartut aqqanillit, arferit puisillu pissatat pillugit isumasioqatigeeqqammerput.
KNAPK, ICC, aalisarnermut piniarnermullu pisortaqarfik isumasioqatigiissitsinermi aammattaaq peqataatitaqarput.
NAMMCO aappaagu februaarimi ukiumoortumik ataatsimiissaaq, piniariaatsinullu tunngasunut ataatsimiititaliap innersuussutai nalunaarusiami ilaatinneqassasut oqaatigineqarpoq.
