Pissassaatitorsimasut isertitsivimmiittussanngor-tinneqarsinnaalerput

Nunatsinni nakorsaatinik pissassaatinik inerteqqutinik atuisimasut atuiniarsimasulluunnit isertitsivimmiittussanngorlugit augustimit pineqaatissinneqarsinnaalerput, tamannalu pivoq, inatsisissatut siunnersuut Folketingip akuersissutigimmagu.

Tamanna pillugu Nunatsinni timersortartut kattuffianni siulittaasoq Nuka Kleemann ima naliliivoq:

- Inatsisinik sukaterineruvoq, aalajangernerlu iluarisimaarparput. Kattuffitsinnit pissasaatinik atuisartut akuerisinnaanngilagut.

Nuka Kleemann aamma oqarpoq, inatsisinik sukaterinikkut nunarsuarmioqaanerput taamaalilluni ersersinneqartoq, unammisartullu amerliartuinnartillugit taama ittunik inatsiseqarnissaq pisariaqartoq.

Nuka Kleemann aamma erseqqissaavoq, pissassaatinik imaluunnit nukkassaatinik atuisut tassaanerusut inuit kusanarusullutik atuisartut, pimoorussillutillu timersortartut akornanni pissassaatitortunik maanna tikillugu naammattuuisoqarsimanngitsoq.

- Avataanit isigineqarnitsinnut minnerunngitsumillu timersortartut atuisimasutut paasineqartut unammisarnerni peqataasinnaajunnaarsinneqarnissaat taamaaliornikkut aqqutissiiuunneqarmat iluaqutaasussaassaaq. Nuka Kleemann oqarpoq.

Nunatsinni pissassaatinik atuisoqannginnissaanik 2001-imili nakkutilliisoqalerpoq.