Pissassaatit pineqaatissiissutaalissasut

oktobarip 14-at 2004 12:11

Nunatsinni nakorsaatinik pissassaatinik inerteqqutaasunik atuisimasut atuiniarsimasullunnit akiliisinneqarlutilluunnit arsaarneqartarnerat Inatsisartut sakkortusinialerpaat, taamaalillutik unioqqutsisimasut pineqaatissinneqarlutik allatulluunnit eqqartuunneqartalissallutik.

Inatsisinik sukaterinissamut tapersersuisut ilagaat, Nuummi timigissartarfimmi Fit & Fun-imi sungiusaasoq Carsten Sørensen.

- Timigissartarfimmi nukippassuit atorlugit angusaqarumallutik timigissartuartut eqqarsaatigalugit allat pissassaatinik atuillutik angusaqarluarneruniartarnerat pitsaasuunngilaq, taamaattumik inatsisit sakkortunerulersinneqassappata isumaqatigaara. Carsten Sørensen oqarpoq.

Peqqinnissamik isumaginnittoqarfik pillugu inatsisilianik unioqqutitsinermi pineqaatissiisarneq Inatsisartut ullumi aappassaaneerlugu oqaluuserereerpassuk, inatsisissaq Folketingimut ingerlateqqinneqassaaq, Inatsisartunilu siullermeerlugulu oqaluuserineqarmat partiit Kattusseqatigiillu tamarmik tamakkiisumik akuersissutigereermassuk aappassaaneernerani taamaallaat taasissutigineqarnissaa naatsorsuutigalugu Peqqinnissamut Naalakkersuisoq Asii Chemnitz Narup ilisimatitsivoq.