Pissartat soriagassaanngitsut

Arnat GSS Nuummeersoq aamma SAK Sisimiuneersoq finalermata ilimagisamit pissangannginneroqaaq unamminnerni aallarniutaasuni unamminerannut sanilliutissagaanni. GSS arsarfimmi naalagaavoq SAK-lu ajorsarterujussuarlugu.

Minutsit 18-it aatsaat ingerlareersut SAK siullermeerluni isertitsivoq sulilu minutsit qulit ingerlaqqereermata aatsaat isertitseqqillutik. Pissaanermik takutitsineq naqissuserlugu unammineq 26-11-mik angusaqarfiuvoq.

GSSip sungiusaasuata Johannes Grothip SAK unitsivippaa arsartui pingaarnerit Linda Lyberth aamma Geerdaaraq Ingemann immikkut paaritikkamigit. Tamatumunnga SAK qaangeriutissarsinngilaq taamalu ukiut marluk tulleriit sølvinnannertik naammagiinnartariaqarlugu.

GSSip angutitai finalemi muminnissaq sioqqullugu NÛK-mit akiorluarneqarput. Sungaartunilli atortut siuarput unamminerup sinnera illersorsinnaasaminnik taamalu 33-29-mik ajugaallutik.

Unammineq sivitsorpaat
Angutit bronzennanniunnerat pissanganavippoq Nagdlúnguak Ilulissaneersoq aamma SAK Sisimiuneersoq unammineq sivitsoqqaarlugu ajugaasussarsimmata tassani Nagdlúnguak ujaminnammat. Unamminermi tasssani tamarmik ajugaasinnaasimagaluarput, taamaattoq iluliarmiut qorsunnik kiatillit ajugaapput 34-29-mik.

Arnat bronzennanniunnerat aamma pissanganarpoq Nagdlúnguak Ilulissaneersoq aamma NÛK Nuummeersoq unammimmata. NÛK muminnermi 15-11-mik siuaqqavoq. Nagdlúnguarli mumereernermi aqutsisuulerpoq unamminermilu 30-28-mik ajugaalluni.

Aajuku sapaammi angusat:
Norsaq HC - K-33 37-30 angutit normu 5-nngorniunnermi
Nagdlúnguak - NÛK 30-28 arnat bronzennanniuttut
Nagdlúnguak - SAK 34-29 angutit bronzennanniuttut
GSS - SAK 26-11 arnat finale
GSS - NÛK 33-29 angutit finale.

Ukiup iligiivi angutit:
Lars Kjølby, NÛK
Hans Knudsen, NÛK
Andreas Lorentzen, GSS
Miki Heilmann, GSS
Miilu Rosing, GSS
Karl Rosbach, Nagdlúnguak

Ukiup iligiivi arnat:
Rina Møller Lorentzen, GSS
Geerdaaraq Ingemann, SAK
Najaaja Lyberth, GSS
Stina Nielsen, NÛK
Linda Lyberth, SAK
Christina Lange, Nagdlúnguak