Pissartat Nuummut tikipput
Qallunaat assammik arsallammaat arnat Nuup mittarfianut tikeqqammerput. Arnat taakku nunarsuarmi tusaamasaapput, pissartanngorniunnerit nuimanersaanni kuultinnattartutut, nunarsuarmilu assammik arsartartut kakkannerpaartaattut ilisimaneqarlutik. Aappassaa nunatsinnut tikeraarput, tamatumuunalu Nuuk Ilulissallu tikeraassavaat, ilaatigut angutinut inuusuttuaqqanut unamissallutik.
Arsartartulli tamakkerlutik nunatsinnut tikinngillat. Arsartartut nuimanertaat, Line Daugaard Kristine Andersenilu klubbiminnit sulinngiffeqarsinnaannginnertik pissutigalugu peqataanngillat.
Nunatsinnut tikeraarnerat Europami pissartanngorniunneq Ungarnimi pisussaq sioqqullugu pivoq, nunatsinniinnertillu unammeriaatsiminnik imminnullu nukittorsaqatigiinnissaanut atorniarpaat.
Aammali assammik arsarnermi piginnaasaminnik takutitsissapput angutit inuusuttuaqqat nunanut allanut unammisartut unammissagamikkik.
Angalaqatigiit arfininngorpat Ilulissanut ingerlaqqissapput, ataasinngorpallu Dabmarkimut utissapput.
Angalaneq Arnat arsartartut nunatsinnut tikeraarnerat piviusunngorpoq suliffiutillit assigiinngitsut, Svend Junge siuuttoralugu aningaasaliissuteqarnerisigut.
