Pissartanngorniutivinnissamut anngunniuttoqarpoq
Isikkamik arsaalluni nunatsinni pissartanngorniunnerit pissutigalugit inuit 200-t missaanniittut ulluni makkunani Uummannamiipput – tassa holdit peqataasut tapersersortaallu.
Uummannami politiit isumaqarsimagaluarput tamanna ajornartorsiulertitsisinnaassasoq. Taamaattoqanngilarli.
- Inuit qiimasimaqaat eqqissisimaqalutillu, Uummannami politiassistenti David Kofoed oqarpoq.
Aqagu pissartanngorniutivinnerit pissapput, tamannalu pitinnagu anngunniunnerit kingulliit ullumikkut ingerlanneqarput.
Pissartanngorniutivinninnernut annguttut siulliit tassaapput B-67 Nuummeersut, taakku Qeqertarsuarmiunut G-44-mut 2-1-mik ualeq manna ajugaapput.
B-67-ip aqagu kikkut unammissanerai tassuugunnguaq paasinarsissaaq, maannami unammimmata N-48 Ilulissaneersut kiisalu siorna pissartat Malamuk Uummannameersoq.