Pissartanngorniulluni unamminerit siulliit marluk naammassipput

Isikkamik arsaallutik angutit nunatsinni pissartanngorniunnerat Nuummi arsaattarfimmi ullumi ingerlaqqippoq, silalu ippassarnit ajunnginneroqaaq.

TM-62 Kulusummeersut aamma Kagssagssuk Maniitsumeersut siulliullutik unammipput. Unamminermi tassani tupaallannartoq siulleq pivoq. Tassa tunuminngaaneersut TM-62 Kagssagssummut ajugaapput, pissanganaqisumik unammereerlutillu, TM-62 marloraarpoq Kagssagssuk ataaseraartoq, Kagssagssuk strafferluni isersitsinngitsoormat kingornalu målimik ataatsimik siuarluni, unamminerullu immikoortua siulleq taama inerneqarpoq.

Unamminerup immikkoortuata aappaata qiteqqunnerani TM-62 isertitsivoq, taamaalillutik unammisut naligiilerlutik, unamminerullu naammassinissaanut minutsit marluinnanngortullu Kulusumminngaaneersut ajugaassutissaminnik isertitsipput, tassalu TM-62 pointinik arfinilinnik unamminerni marlunni katersereerami ingerlaqqinnissani qulakkeerunarpaa.

Siorna pissartangorniuttoqarmat Tasiilameersoq ATA tupaallatsitsivoq, immaqa TM-62-p maanna nanginnialeqaa?

Tulliullutik Kugsak 45 Qasigiannguaneersut aamma Malamuk Uummannameersut unammipput, unamminerlu taanna tallimanut tanneq qulit missaanni naammassivoq, unammisut tamarmik ataaseraarput.

Nuummi arsaattarfimmi holdit tamarmik peqataaffigisaannik massakkorpiaq ammaanersiortoqarpoq.

Nalunaaqutaq arferngup qeqqanut unammilissapput

B-67 Nuummeersut taavalu K-33 Qaqortumeersut.

Ullumikkullu kingulliullutik unammissapput Tasiusameersut Eqaluk 54 aamma N-48 Ilulissaneersut.

Unammineq taanna qanoq inerneqarsimanersoq aqagu ullaakkut Radioavisimi tusarsinnaavarsi.