Imigassaq pillugu siunnersuisoqatigiit: Pissarsiariuminarnerulerpat tuniniaaneq annertusissaaq

Imigassaq pillugu inatsisip maanna atuuttup qanoq angusaqarfiunera paasinagu allanngortinneqarnissaa Imigassaq ikiaroornartullu pillugit Siunnersuisoqatigiinni siulittaasup, Inga Dora Markussenip, ernumanartoqartippaa.
Allattoq Jonas Fievé
novembarip 20-at 2018 07:07

Imigassaq pillugu inatsisip ukiuni pingasuni atuunnissaa siunnersuisooqatigiit kissaatigigaluarpaat. Inatsisimmi atuunnerata kinguneri suunersut paasisaqarfiginissaat pisariaqartoq, siulittaasoq isumaqarpoq:

- Uppernarsaatit assigiinngitsutigut takutinniarneqarsinnaasut qanoq iluaqutaasimanersoq imaluunniit iluaqutaasimannginnersoq. Ammasarfiit sivitsorneqarpata "fiisterneq" sivitsorneqarsinnaavoq angerlarsimaffimmi, Imigassaq ikiaroornartullu pillugit Siunnersuisoqatigiinni siulittaasoq, Inga Dora Markussen, taama oqarpoq nangillunilu:

AAMMA ATUARUK Imigassaq pillugu inatsit sukannerpallaarunnaassaaq

- Ataguli utaqqimaarta. Ukiut pingasut qaangiuppata siunertaa ilumut eqquutsinneqarsinnaanersoq, tassa imatut meeqqat inuusuttuaqqallu imigassartortariaasiat allanngortinneqarsinnaannginnersoq tassuunakkut. Isumaqarpunga taanna pingaaruteqartoq utaqqimaaqqaartussaallugu, siulittaasoq oqarpoq.

Imigassallu pisiniarfinni assiaqusersorneqartalernerat innuttaasut sungiutereeraluaraat, Siunnersuisoqatigiit naliliipput:

- Isumaqarpunga taamatut assiaquteqarneri ingammik ukua matoqqatillugit iluaqutaalereersut. Uanga takusinnaasara malillugu ajornaquteqanngilaq, inuit soorlu sungiuteriiginnarsimagaat, Inga Dora Markussen, taama oqarpoq.

Imigassaq pillugu inatsisip sakkukillineqarnissaa Inatsisartuni amerlanerussuteqartut ataasinngormat akuersissutigaat, Naalakkersuisullu taamaalillutik inatsisissatut siunnersuummik nutaamik taamaalillutik suliaqartussanngorput.