Pissakinnerusut juullimi aaqqissuussinissaannut ikiorserneqassapput
Ilaqutariinnut pissakinnerusunut tunngatillugu juullikkunni aaqqissuussinissanut kommunit tamarmiullutik aningaasanik qinnuteqarput tapiiffigineqarlutillu. Nunaqarfiit illoqarfiillu 43-t aningaasanik tapiiffigineqarput - kangiani Tasiilamit, kitaani Maniitsumut, avannaani Qaanaamut kujataanilu Qaqortumut, soorluttaaq nunatsinni nunaqarfiit tamarmik aningaasanik tapiiffigineqartut.
2014-imi juullikkunni aaqqissuussinissanut aningaasat 400.000 koruunit missaanniittut tapiissutigineqarput. Aningaasat aaqqissuussanut assiginngitsorpassuarnut atorneqassapput. Siorapalummi ilaqutariit aalisartukkormiut piniartukkormiullu juullikkuni nereqatigiinnissaat, Niaqornaarsummilu anaananut kisermaanut juullerpalaartinneqarnissaannut tapiissuteqarfigineqarput. Tapiissuteqarfigineqartut tamarmik ilaqutariinnut pissakinnerusunut tunngatinneqarnerat assigiissutigaat.
- Juulli tamatsinnut isumaqartorujussuuvoq. Taamaattumik nuannaarutigaara inunnut pisariaqartitsinerusunut nunarput tamakkerlugu juullikkunni aaqqissuussinissanut assigiinngitsunut ukioq maannattaaq ikiorsiisinnaagatta. Tamanna kissalaartumik tapersiineruvoq, Ilaqutariinnermut, Isumaginninnermullu Naalakkersuisoq, Martha Lund Olsen tusagassiutinut nalunaarummini allappoq.
