Pisortatiguunngikkaluamik oqallissapput

Danmarkimi avatangiisinut ministeri Connie Hedegaard nunani tamalaani ministerinik 24-nik Ilulissani sapaatip-akunnerani tullermi ataatsimeersuartitsissaaq.

Nunani tamalaani ministerit ataatsimiigiarnertik iluatsillugu silaannaap allanngoriartornerata aallartereernera qanimut takussavaat.

Connie Hedegaard oqarpoq, avatangiiseq pillugu suliassat unamminartut qanoq iluarsiniassanerlugit qinikkat tunuarsimaarnatik oqaluuserissagaat.

- Pisortatigoortuunngitsumik oqallissaavut. Imaanngilaq, qinikkat atorfilittarpassuatik ilagalugit oqalugiaaterujussuarnillu allassimallutik ataatsimiigiassasut. Eqqissilluta isertuanatalu matoqqasumik oqaloqatigiissaavut. Connie Hedegaard nassuiaavoq.

Assersuutigalugu Kyotomi isumaqatigiissutip silaannarmik mingutsitsinermut tunngasoq ukioq 2012-imi atorunnaarpat susoqassanersoq oqaluuserineqassaaq.

Connie Hedegaardilli erseqqissaatigaa, nunat tamalaat nutaamik isumaqatigiissutissaannik Ilulissani suliaqartoqarnavianngitsoq, killeqarfiilli akimorlugit paasinninnerulersitsinissaq siunertaasoq, tulliani isumaqatigiinniartoqalerpat isummanik allanngortitsisinnaanissaq neriuutigineqarluni.