Pisortatigoortumik utoqqatserneq Mary Simon-ip nuannaarutigaa
Naggueqatigiit Inuit Indianerillu meerartaat tusindtilikkaat 1950-kkunniit 1970-kkut tikillugit peqquserluffigineqartuartarsimapput.
Naggueqatigiit Inuit Indianerillu meerartaat tusindtilikkaat ukiuni taakkunani pinngitsaalillugit ilaqutaannit peersinneqartarsimapput, Canadallu kujasinnerusortaanut katuullit atuarfiannut najugaqarfissaannut inissineqartarlutik, tassanilu uppernarsineqarpoq eqqarsartaatsimikkut kinguaassiutitigullu atornerlunneqartuartarsimasut, inuunerannik aseruutaaqisumik. Angajoqqaarpassuit ilisimatinneqartarsimanngillat meeqqaminnik arsaarneqarnissaminnik, ilaasalu kingorna takoqqinngisaannarpaat.
Radioaviisimiillu Mary Simon-ip oqalugiaatissaata imaa pissarsiaraarput, aallarniumminilu ulloq 11. juni taavaa ulloq taannaammat naggueqatigiinnut inunnut indianerinullu pinngitsaaliisamik arsaarneqartunut tuppallersaqatigiiffissaq.
Iliuuserineqarsimasut ukiorpassuarni isertuunniarneqarsimanerat kiisami ullumikkut Canadap pisortatigoortumik kanngusuutigissavai, tamannalu eqqorneqartunut oqilisaataassaaq.
Mary Simonittaaq pineqartunut toqoreersunut maannalu suli inuusunut angajoqqaanullu meeqqamik qanoq pineqarsimanerinut ilisimasaqarsimanngitsunut eqqarsaatini ingerlatippai.
Aamma iliuuserineqarsimasut imaannaanngikkaluaqisut taamaattoq eqqugaasut ullumikkut nukittullutik meerartaminnut toqqissisimasumik angerlarsimaffimmik pilersitsisinnaanerat nersorinnissutigaa, taamatullu atornerluinerit nipangiutiinnarneqannginnissaannik sorsoqataanerat. Ukiorpassuarnimi utoqqatsertoqarnissaa piumasarineqarlunilu utaqqineqarsimavoq.
Mary Simonip oqalugiaanni naggaserlugu nuannaarutigalugu oqaatigaa, Inuit allallu nunap inoqqaavi oqaluttuarisaanermi naqisimaneqaraluarlutik narrugineqaraluarlutillu ullumikkut inuujuarmata siunissamilu inuusussaallutik.
Piffissami matumani naggueqatigiit inuit indianerit allallu Canadameersut Ottawami katersuutileruttorput,
Canadap ministeriunerata Stephen Harperip pisortatigoortumik utoqqatsernissaa TV-kkut toqqaannartumik ingerlanneqartussaq tusarnaariartorlugu.
