Kommuninut qinersineq Pisortat suliffeqarfii siaruarterneqarlik

Qeqqata Kommuniani borgmesterinngorumaartussaq kommunalbestyrelsinngorumaartussallu suliassassaaleqinavianngillat.

Kommunimi suliffissaqartitsinissaq taakkunannga qulakkeerneqartariaqarpoq. 

Qeqqata Kommuniani ukiuni 18-ini borgmesteriusoq Hermann Berthelsen taama kaammattuuteqarpoq.

- Illoqarfik pingaarnersatsinninngaanniit suliffippassuit, nuna tamakkerlugu akilersorneqartut, "naligiimmik siunissaqartilluta"-mik qulequtaqartut, aamma taakkua nuussorneqarnissaanut Naalakkersuisunut aamma kaammattuiuassasut, borgmesteri Hermann Berthelsen oqarpoq.

AAMMA ATUARUK Hermann Berthelsen sassaqqissanngilaq

Pisortalli suliffeqarfiutaannik nuussinissaq ajornakusooqisoq allat misilittagaraat, Hermann Berthelsenillumi aamma paasivaa, KANUKOKA-p sulisuisa Maniitsumut nuunnissaat ajornartoq.

Taamaakkaluartoq pisortat suliassaataannik nussuinissaq ajornartorsiutaangaarnavianngitsoq, borgmesteri isumaqarpoq.

- Pilersaarusioreernikuuagut, tamakku perullugit, tigoriaannaapput. Taava neriuppugna aamma avammut saqqummiussisarnermikkut taava oqartassasut, Inatsisartut Naalakkersuisullu paasitissagaat taanna iluarsisariaqartoq.

Hermann Berthelsen kommunalbestyrelsimi ukiuni 34-ni sulinermini ilaatigut Kangerlussuarmiit Sisimiunut aqqusineqalernissaq sulissutigaa. Taavalu aamma qaarusummi naluttarfiliortoqarnissaanik suleqataalluni.

AAMMA ATUARUK Berthelsen: KANUKOKA atorunnaassappat uggornassaaq

Suliniutillu taakku suli naammassineqanngitsut kommunalbestyrelsinngortussat borgmesterinngorumaartussallu nangeqqissavaat, suliffeqarfiilli, illoqarfissuarmut eqiterunneqartut, sinerissamut siaruarternissaat taakkunanit salliutinneqassasut, Hermann Berthelsen KNR-imut oqarpoq.

Apriilip sisamaani kommuninut qinersisoqassaaq.