Pisortat suliaasa annikillisarneqarnissaat tamarmik kissaatigaat
- Misissuinerpaaluit oqaatiginikuuaat, pisortat namminersortullu ingerlataqarnerisa nikisikkiartuaarnissaat pisariaqartoq. Oqaatigineqarpoq, pisortat assigiinngitsutigut ullumikkut sunniuteqarpallaartut, imminullu napatittumik aningaasarsiulissagutta, namminersorlutik ingerlatsisut amerliartornissaat ujartussagipput, Niels Thomsen oqarpoq.
Misissuinerillu, Demokratineersup Niels Thomsenip eqqartugai tassaapput Akilerartarneq atugarissaarnerlu pillugit ataatsimiititaliap nalunaarusiaa saqqummeqqammertoq aammalu Namminersorneq pillugu kalaallit Ataatsimiititaliarsuata nalunaarusiaa ukiut arfineq pingasut qaangiuttut saqqummersoq.
Aammalumi nalunaarusiaq kingulleq Siumumeersup Kim Kielsenip tikkuarpaa nassuiaramiuk, sooq illua tungiliuttut Inatsisartut sinnerisut ullumi akuersinersut, pisortat suliffeqarfiutaat qanoq ililluni sunniuteqarpallaarunnarsinneqarsinnaanersut misissoqquneqarmat.
- Tassa oqarsinnaavugut, immaqa qangali taamaassimavoq. Taava pisortat ingerlataat neqerooruteqarnikkut qanoq ililluni suliarineqartalernissaat qulaajarneqartariaqarpoq - akikinnerusumik kisianni ajornerunngitsumik, Kim Kielsen oqarpoq.
Namminersorneq pillugu ataatsimiititaliaq 2003 ilaatigut inerniliivoq, pisortat suliffeqarfiutaat ima sunniuteqartigisut, allaat namminersortunit unammillernissaat ajornangajalluni.
Suliassanik suliariumannittussarsiuussigaanni, akisussaaffik pisortaaniiginnartarpoq, namminersorlutilli inuussutissarsiortut suliassanik suliarinnillutik.
Tassalu suliffiutillit taamaalillutik imminnut unammissapput, taamaammallu aningaasartuutit imaassinnaalluni minnerulertut.
Kisianni innuttaasut sullineqarnerisa pitsaassusaat uani sapaginneqassanngitsoq, Niels Thomsen erseqqissaavoq.
- Soorunami eqqumaffigisassaqarpoq. Taamaattumik isumaqatigiissusiortoqartariqarpoq, tassanilu ersarittariaqarpoq, suliaq suna qanoq pitsaassuseqartumik kivinneqassanersoq. Sorunalimi avaqqunneqarsinnaanngitsunik piumasaqaasersuisoqassaaq.
Suliassat assigiinngitsut namminersortunit ullumi naammassineqartareerput, soorlu eqqiaaneq nerisarfinnik ingerlatsineq aammalu soorlu qarasaasianik paarsineq.
Niels Thomsen misissuisoqareertinnagu oqarusunngilaq, suliassat suut namminersorlutik inuussutissarsiortunit naammassineqartalersinnaanersut, nammineq eqqarsaatiginerini.
Kisianni IA-miit Naaja Nathanielsenip kissaatiginngilaa suut tamarmik namminersortunit suliarineqartalissasut, assersuutigalugulu Innaallagissiorneq attaveqarnikkullu atortut namminersorlutik suliffiutilinnut tunniunnissaat mianersoqqussutigaa.
- Pisortat suliassaasa ilaat nikisikkusunngilagut, pissutigalugu taamaaliorutta imaassinnaammat, akit illoqarfimmiunut minnerulersut, allanullu annerulersut. Tamakkua eqqumaffigisariaqarpagut, tassami politikeritut pisortallu isumaginniffiisut inuiaqatigiit tamaasa akisussaaffigaavut, namminesorlutillu inuussutissarsiortut suliarinnilersussat taamaattumik akisussaaffeqalerrnavianngillat, IA-meeersoq Naaja Nathanielsen oqarpoq.
Taanna qularutiginnittutut imminut taavoq, aammali suliassaqarfinni killileriikkani namminersortunut suliassanngortitsinissamut tapersiilluni.
Aamma akileraartarneq atugarissaarnerlu pillugit ataatsimiititaliaq qanittukkut erseqilluinnartumik allappoq, siunissami atugarissaarnerup aningaasalersornissaa, namminersorluni inuussutissarsiornikkut aningasalersorneqarnerusariaqartoq.
