Pisortat soraarnerat akisusimaqaaq
Naatsorsuutinut oqaaseqaatini takuneqarsinnaavoq pisortaqarfik siorna akissarsianut 33,5 miliuunit koruuninik aningaasartuuteqarsimasoq, ”bonusit ilanngullugit”, soorlu taama allassimasoq. Ukiup siuliani pisortanut aningaasartuutit 11,5 miliuunit koruuniupput. Sermitsiap nittartagaa naapertorlugu aningaasartuutit amerleriarnerannut pissutaaqataapput pisortat Keld Askærip aamma Henrik Lethip suliffeqarfissuarmit soraarnerannut atatillugu, aningaasanik miliuuninik marlunnik kisitsisitalinnik aningaasartuutaasimanerat.
Sinneqartoorutit akileraarutit akilerneqartinnagit 63 miliuunit koruuniupput, siorna 65 miliuunit koruuninik sinneqartoortoqartoq. Tamatuma saniatigut aningaasat kaaviiaartitat 205 miliuunit koruuninik ikileriarput, siorna ukiumi naatsorsuiffiusumi 5,1 miliardi koruuniullutik.
Siulersuisut siulittaasuata Peter Grønvold Samuelsenip naatsorsuutit ajorseriarnerannut pissutaasut assigiinngitsut tikkuarpai, tassa pisortat tunuarnerisa saniatigut, soorlu raajarniarnermut nalunaarut nalorninartorsiortitsisimavoq, suliffeqarfissuullu oqaatigaa, tamanna Royal Greenlandimut 35 miliuunit koruuninik akeqarsimasoq.
Royal Greenlandip kaaviiaartitami ukiormanna seks procentinik amerleriaateqarnissaat anguniarpaa, tassa 5,4 millardit koroninngortillugit, suliffeqarfissuarmi pisortap Flemming Knudsenip ippassaq ukiumoortumik ataatsimeersuarnermi taama oqaatigigaa, Sermitsiaq allaaserinnippoq.
