Pisortat qarasaasialerisarfiat namminersortumit pisiarineqarpoq
Sermit IT 2,5 millionit koruuninik siorna amigartooruteqarpoq.
- Suliffeqarfinni taakkunani soraarsitsiortortoqassanngilaq, tamarmillu immikkut suleriaaseqarnertik ingerlatiinnassavaat, Combymi pisortaq piginneqataasorlu, Brian Torp, oqarpoq.
Comby ukioq 2002-mi pilersinneqarpoq, ullumikkullu 25-nik sulisoqarluni, ukiumullu 40 millionit koruunit kaaviiaartittarpai. Sermit minnerulaartuuvoq, tassa 20-nik sulisoqarluni, sulisullumi tamavimmik atorfissaqartinneqarput.
- Sulisut ilisimasaat Kalaallit Nunaanni, ilami Europamiluunniit, qaffasinnerpaapput. Taamaammat ilisimasaat siunissami atorluarniartariaqarpavut, Brian Torp oqarpoq.
- Namminersortut kommunillu Sermit IT qarasaasialerisoqassatillugu pinngitsooratik atortussaallugu manna tikillugu inissisimagaluarput. Imaassinnaavoq taama inissisimanertik piginnittaasa sulisuisalu asuli sinnassaatigiinnarsimagaat. Massakkulli taamaattoqarunnaassaaq, tassami sullitavut iluamik sullittariaqalerpavut, Brian Torp erseqqissaavoq.
Taanna Sermit IT-p siulersuisuni decembarip ulluisa aallaqqaataanni siulittaasunngussaaq. Sermit IT-p maanna pisortaa, Ole Kielmann Hansen, Combyp iserterluarnissaata tungaanut ingerlatsigallassaaq.
