Pisortat piniartut ilisimasaannik katersipput
Qaanaami Upernaviullu nunaqarfiani avannarlermi piniartut aalisartullu ilisimasaannik Piniarnermut aalisarnermullu pisortaqarfimmi atorfilittanit decembarip qaammataani paasisassarsiorfigineqarput.
Paasisat siunissami pisussuusutinut uumassusilinnut iliuusissanut tulleriiaarinermut atorneqassapput.
Thimothæus Petersen Kullorsuarmi piniartuuvoq nunaqarfimmilu aqutsisuni siulittaasuulluni, taanna paasiniaanerup kingunissaanut neriulluarpoq.
-Atorfillit apeqqutinik nassarput, taakkulu aallaavigalugit akisarpugut, nammineq aamma piniartutut inuunermi aporfiit taakkartorpakka, soorlu killilersuinerup kingunerisaanik, pisassiinermi piniartutut allagartallit utoqqalinersiallit aamma tunineqartunut ilaasarput, taakkuuppullu piniartuiit pisassaannik arsaartuisut, Thimothæus Petersen oqarpoq.
Pisortani atorfillit paasissutissanik tigusilluartut Thimothæus Petersenip unnersiuutigaa.
- Paasissutissat tunniussagut tigulluarpaat, neriunarporlu suliaq naammassippat naalakkersuisut tigugunikkut paasissutissat atorluarumaaraat.
Taanna aamma oqarpoq pisuussutit uumassusillit siunissami qanoq nakkutigineqarnissaanut ingerlanneqarnissaanullu iliuusissanik tulleriiaarinermi aningaasarsiorfissat allat, soorlu takornariarlerinermut tunngasut ilanngullugit eqqartorneqarumaartut.
- Neriuppunga piniartutut inuussutissarsiornermi pitsanngorsaatit siulliit ukioq ataaseq ukiulluunniit marluk ingerlanerini malunnarsiumaartut, Thimothæus Petersen oqarpoq.
Pisortani atorfilittat angalallutik paasissutissanik katersisut, nunaqarfinni aqutsisunik innuttaasunillu oqaloqatiginnillutillu ataatsimiisitsisarput, Kullorsuarmi piniartut aalisartullu peqatigiiffiani siulittaasoq Karl Lars Nielsen aamma neriuuteqarluarpoq, taanna isumaqarpoq piniartut ajornartorsiutaat paasineqarlutillu tigulluarneqartut. Kullorsuarmi inuttaasut 400-it missaaniittut angutitaasa amerlanersaat piniarnermik inuussutissarsiuteqarput.
