Pisortat missingersuutaanni amigartooruteqarsinnaalersitsisumik Naalakkersuisut siunnersuuteqartut

Nunatta karsiata isertitai aningaasartuutaalu nikingaleraluttuinnassasut naatsorsuutigineqarpoq.

Nunattalu aningaasaqarneranut aqutsisut tamanna eqqarsaatigisariaqarpaat.

Taamaammat missingersuutinut inatsit nutaaq kommunit Namminersorlutik Oqartussallu missingersuutaasa sinneqartooruteqassanngippata oqimaaqatigiiffiusariaqarnerannut piumasaqaatitalik politikerit 2016-imi atuutilersippaat.

Piumasaqaalli taanna ilaatigut Qaasuitsup Kommuniata avinnerani ajornartorsiortitsimmat 2018-imi atorunnaarallartinneqarpoq. Naalakkersuisulli piumasaqaatip malinnissaa ilungersuutigisarpaat, aningaasanullu inatsisit maannamut oqimaaqatigiiffiusarput.

AAMMA ATUARUK Aningaasaqarnermut naalakkersuisunngorlaaq: Milliardinik akiliutaasinnaasoqarpoq

Inatsit malillugu nunatta aningaasaqarnera naalakkersuinermik suliallit aqussinnaanngisaannik sunnerneqassappat, aningaasanut inatsisit amigartooruteqarfiusinnaapput.

Taamaattoqassappalli Inatsisartut akileraartarnermut aningaasaqarnermullu ataatsimiititaliaata akuereqqaartariaqarpaa.

Piumasaqaalli piffissaq ungasinneq eqqarsaatigalugu aningaasarsiornermut akornutaasinnaasoq Naalakkersuisut nutaat isumaqarput, inatsimmullu nutarterutissamik maanna tusarniaallutik.

Aningaasanut inatsisit oqimaaqatigiiffiunissaat suli piumasaqaataassasoq erseqqissaatigaat.

AAMMA ATUARUK Aningaasaqarnermik ilisimasalik missingiutaagallartut amigartoorfiunerannut eqqissisimasoq

Aningaasanulli inatsisit ukiuni sisamani amigartooruteqarfiusinnaanissaat siunnersuutigaat.

Ineqarnermummi, inuussutissarsiornermut imaluunniit attaveqatigiinnermut atortulersuutinik suliniutinut nunatta aningaasaqarneranut siunissami isertitaqarfiulluarsinnaasunut aningaasanut inatsisip amigartooruteqarfigissagaluarpaguluunniit aningaasaliisinnaalernissaq Naalakkersuisut siunnersuutigaat.

Aningaasanut inatsisip amigartooruteqarfiunnginnissaanik maanna piumasaqaataasoq atuutsillugu assersuutigalugu Naalakkersuisut inuussutissarsiornermi suliniummut aningaasaliiniartillutik aningaasanut ukiunut sisamanut inatsimmi sipaaruteqartorujussuusariaqarput.

- Taamaammat aningaasaliinikkut suliniutit immikkut ittut piumasaqaatit ilaat naapertorlugit missingersuutini inissisimanermik naatsorsuusiornissamit mininneqarnissaannut periarfissiinissaq pisariaqarpoq, Naalakkersuisut siunnersuumminni allapput.

AAMMA ATUARUK Naalakkersuisut aaqqissuusseqqinnerup sukkassusaa illersoraat

Inatsisartullu inatsit allanngorpassuk, aningaasanut inatsisip amigartooruteqarfiunissaa ajornannginnerulissaaq. Aningaasaliinerilli nunatta karsianut piffissami ungasinnerusumi isertitaqarfiusariaqassasut, Naalakkersuisut siunnersuumminni allapput.

- Piumasaqaatinut ilaatigut ilaapput, aningaasaliinikkut suliniut immikkut ittumik nalileereernerup kingorna aningaasaliinerup inuiaqatigiit aningaasaqarnerannut pitsaasumik iluanaaruteqarnissaa uppernarsarneqarsinnaanissaa, Naalakkersuisut allapput.

Aningaasanulli inatsisit amigartooruteqarfiussappata, Inatsisartut akuerseqqaartariaqartassapput.