Pisortat atugassarititaat ineriartornermi sunniuteqartarput
Meeqqat inuusuttullu atugarisaat kommunerisaq apeqqutaatillugu assigiinneq ajorput, assigiinngitsunillu atugassaqartitaaneq periarfissaqartitaanerlu inuttut ineriartornermut annertuumik sunniuteqartartoq, Namminersornerullutik Oqartussani nalunaarusiortitaq naliliivoq.
Namminersornerullutik Oqartussani Meeqqat Inuusuttullu Pillugit Ilisimasaqarfiup naalisarlugu MIPI-p nalunaarusiaa sapaatip-akunnerani kingullermi saqqummiunneqartoq assigiinngitsunik imaqarpoq, soorlu paaqqinnittarfeqarnermut, atuarfeqarnermut sunngiffimmilu atugassarititaasunik imaqarluni. Assersuutigalugu atuarneqarsinnaavoq, Ammassalik Kommunemi meeqqat taamaallaat sisamararterutaat paaqqinnittarfinni inissaqartinneqartartut, killorluinnaanik Ilulissat Kommuneanni meeqqat 100-gaangata 82-it inissaqartinneqartartut.
Taamatuttaaq atuartitaanikkut sunngiffimmilu kommunit neqeroorutigisartagaat minnerunngitsumillu aningaasaliissuteqartarnerat assigiinngeqaat.
- Tamakku tamarmik kommunalbestyrelsep akisussaaffigai inatsisillumi akuerineqarsimapput. Taamaattumik kommunalbestyrelset pingaarnersiuillutik tulleriiaarisarnerat matumani isorisassartaqanngilaq. Pingaaruteqarporli kommunalbestyrelsenit, Namminersornerullutik Oqartussanit inuiaqatigiinnillumi ilisimassallugu qanoq tulleriiaarisoqarnersoq, tulleriiaarinerillu pissusissamisoornersut isertuanani oqaluuserisassallugit. Inuiaqatigiit aaqqissuussaanerannik ilisimatusarsimasoq, misissuinermi aaqqissuisuusimasoq MIPI-milu ataqatigiissaarisoq Nina Banerjee taama oqarpoq.
Aamma erseqqissaavoq, nunani allani misissuinerit uppernarsisissimagaat, meeraanermi paaqqutarineqarluarsimaneq kinguaariinni isumaginninnikkut atugarliuutigineqarsimasut qaangerneqartarnerannik kinguneqartartoq.
- Kalaallit Nunaannilu anguniarneqarpoq, meeqqeriviit atuarfitsialammut isertinnani piareersarfiussasut, taamaattumik meeqqat tamarmik sumiikkaluarunilluunnit pitsaasumik paaqqutarineqarnissamik neqeroorfigineqarnissaat pingaaruteqarpoq. Nina Banerjee erseqqissaavoq.
