Pisortat aningaasaleeqataanerat danskit narrutsaatigaat
Atuagaq Jonathan Motzfeldtip novemberimi 70-iliineranut atatillugu saqqummersoq ullumi Danmarks Radiomi P1-imi oqallisigineqarpoq. Weekendaviisimi tusagassiortoq ukiorpanngortuni nunatta ineriartorneranut malinnaasoq, Marianne Krogh Andersen, isornartorsiuisuuvoq
Kultureqarneq pillugu aningaasaliissutaasartuni 1,4 millionit koruunit aningaasarpapilorujussuupput, Marianne Krogh Andersen oqarpoq nangillunilu:
- Aningaasat atugassat ima ikitsigaat allaat kulturimut, filmiliornermut atuakkiornermullu aningaasaliissutaasinnaanatik. Taamaattumik atuagaq taanna sinnilimmik aningaasalerneqarpoq. Marianne Krogh Andersen taama oqarpoq.
P1-ip paasissutissiinera tunngavigalugu saqqummersitsinissamut ataatsimiisitaliaq 1,4 mio. koruuninik saqqummersitsinissamut atugassanik katersaqarsimavoq – P1-imilu oqaaserineqartut malillugit aningaasat atuakkamik saqqummersitsinermut aningaasarpapilorujussuupput.
Namminersornerullutik Oqartussat Inatsisartullu tamarmik 125.000 koruuninik aningaasaliipput, kommunit ataatsimut 150.000 koruuninik – Namminersornerullutillu Oqartussat suliffeqarfiutaat, Royal Greenland aamma Royal Arctic Line tamarmik 100.000 koruuneersimallutik.
