VIDEO Pisortat amerlanerit marluinnik oqaseqartariaqartut
- Allaffissornikkut kalaallisut oqaatsit nukittorsarneqassasut - ima paasillugu oqaatsitta aqutsineq tigussagaat anguniagaavoq, apeqqutaanngilaq qallunaajuneq imaluunniit kalaaliuneq, Peter Olsen KNR-imut taama oqarpoq.
Naalakkersuisut atorfinitsitsisarnermi ilinniartitaarnermilu periusissiornikkut Namminersorluni Oqartussani taassumalu suliffeqarfiutaani imminut aquttuni pisortatut pisortallu tulliatut artorfiit 60-70 procnetiisa arlariinnik oqaasilinnik piginnaasaqartunik inuttalerneqarnissaat pisinnaalersissagaat, Peter Olsenip siunnersuutaata qitererpiarpaa.
Siunnersuut itigartinneqassasoq Naalakkersuisut kissaatigaat Namminersorlutik Oqartussani kisitsisit ilisimaneqanngimmata aammalu pisortat tullersortaasalu arlariinnik oqaaseqartuuneri ilisimaqannginneri tunngavilersuutigalugit. Naalakkersuisulli neriuutigaat, ilinniartitaanerup qaffakkiartornera ilutigalugu pisortatut atorfinittartut arlariinnik oqaasillit amerliartussasut.
Naalakkersuisut siunnersuut itigartikkaluaraat Demokraatit minillugit partiit sinneri tapersiipput.
- Nuna manna inumminik aqunneqartariaqarpoq, aaliangiisinnaagaluaruma tamarmik kalaaliusariaqaraluarput Partii Naleqqap siulittaasua Hans Enoksen taama oqarpoq.
Aamma Suka K. Frederiksen Siumumeersoq isumalluarpoq:
- Uanga isumaqarpunga piviusorsiortuusoq ullumikkut piumasaqassalluta nunaqavissuunissaq aammalu kalaallisut oqaaseqartuuneq piginnaanerusoq, taamaasiornikkut anguniagaq anguneqarsinnaasoq.
Sulinermik inuutissarsiuteqartut Katuffiat SIK aammalu Sulisitsisut Kattuffiat GE siunnersuummut isumaqataanngillat. SIK-p siulittaasua Jess.G Berthelsen isumaqarpoq, taamatut piumasaqarneq peqqinnissaqarfimmut ajornartorsiutitsilersinnaasoq, atorfiit inuttalerneqarsinnaajunnaassasut taanna isumaqarami.
GE-mi pisortaq isumaqarpoq, aningaasat tamakkiinerusumik pitsaanerusumillu atorneqarsinnaagaluartut soorlu ilinniartitaanermut.
Peter Olsenip siunnersuutaa inatsiseqarnermut ataatsimiisitaliamut suliassanngorlugu ingerlatseqinneqarpoq.