Pisortat 2006-imut missingersuutaat saqqummerput

Allattoq Jokum Nielsen
maajip 31-at 2006 10:50

Naatsorsueqqissaartarfiup kommunit Namminersornerullutillu Oqartussat 2006-imut missingersuutaat saqqummerseqqammerpaat 2002-miit 2004-mut naatsorsuutinut, 2005-imullu missingersuutinut assersuussinnaasunngorlugit.

Tamakkiisumik kommunini 3.5 milliardit aningaasartuutigineqassamaarput agguataarnerallu paasinarsaraanni aningaasartuutigineqassamaartullu 100 koruuninngorlugu taava erserpoq inunnut isumaginninnermut 45 koruuni atorneqassasoq, ilinniartitaanermut 20 koruunit atorneqassasut, allaffissornermut 15 koruunit inuussutissarsiornermut 14 koruunit inissaqarniarnermullu 6 koruunit.

Namminersornerullutik Oqartussanut saakkaanni tamakkiisumik aningaasartuutigineqassamaarput milliardit tallimat affarlu. Soqutiginarpoq maluginiassallugu Ilinniartitaanermut, peqqinnissaqarfimmi inulerinerlu pillugit pisortaqarfinni 2002-miit 2006-imut allaffissornermut aningaasartuutit 50 mio. kr.-nik amerleriarsimammata.