Pisortaqarfiup Tanbreez-imit isornartorsiorneqarnini eqqunnginnerarpaa
Killavaat Alannguanni saffiugassanik qaqutigoortunik misissuiffigisamini piiaanissamut akuersissuteqarfigineqarnissamut qinnuteqaatimi suliarineqarnera, Tanbreezip isornartorsiuinermini innersuussutigaa. Piginneqatigiiffik naapertorlugu qinnuteqaat qaammatit 27-it qaangiuttut tunniunneqarpoq.
Tanbreez kiisami aatsitassarsiorsinnaalissagunarpoq
Aammami qinnuteqaammik decembarimi 2014 tunniussisoqarsimasoq, Naalakkersuisoqarfimmit uppernarsarneqarpoq. Taannali amigaateqarsimavoq, ingammik avatangiisinut tunngasortaani. Piumasaqaatit minnerpaaffisssaminnut naammassineqanngillat. Piiaaavimmiit eqqakkat qanoq toqunartoqarumaartiginerannik uuttuinerit amigaataapput. Tunisassiornermi pujoralammik qanoq siaruarterisoqartigissaneranik missingiinerit amigaataapput, soorluttaaq piiaanermi erngup nukinganik atuinissamik paasissutissat amigaataasut. Taava aamma qinnuteqaat oqaatsit eqqortut atorlugit allaneqarluni tunniunneqarsimanngitsoq, naalakkersuisoqarfimmiit allapput.
Tanbreez qinnuteqaamik, aatsitassat pillugit inatsimmi piumasaqaatit minnerpaaffissaannik naammassinnittumik, aatsaat siorna aggustimi tunniussivoq. Taava taamaalereermat pisortat tusarniaanerat aallartinneqarsinnaalerpoq, taamaaliornerlu siorna septembarimiit ukioq manna januaarimut pivoq.
Nalunaarusiaq sukumiisoq, tusarniaanermit akissutinik tamanik imaqartoq, piginneqatigiiffimmit oqartussanillu upernaamiit suliarineqalerpoq, taamatullu oqartussaasut piiaanissamut akuersissummut, akuersissuteqarnernut aalajangersimasunut missingiummik inuiaqatigiillu pissarsiaqaatissat pillugit suleqatigiinnissamut isumaqatigiissummut missingiummik Tanbreez-imut nassiussillutik. Kingulleq tassaavoq Kommuni Kujalliup aamma Namminersorlutik oqartussat piiaaveqalerneratigut qanoq pissarsiaqarumaarnissaannik isumaqatigiissut.
Tamaakkaluartoq piiaalernissamut aqqut suli takivoq. Tassami Tanbreez saffiugassat qautigoortut nunatsinni passunneqartarnissaat pillugu maannamut oqaloqataarusussimanngilaq, aamma sooq nunatsinni tamakkuninnga passussisoqarsinnaannginneranut uppernarsaatinik piginneqatigiiffik maannamut tunniusserusussimanani. Piginneqatigiiffiup suliffissat 80-inut, piiaanerinnarmut tunngasuteqartunut, killilerusuppai, passussinermi suliffissat 160-isut nunani allani inissikkumallugit.
- Taamaalilluni suliffissarpassuit tassani pineqarput, taamaattumik sooq nunatsinni passussisoqarsinnaanginersoq sukumiisumik nassuiarneqarnissa Naalakkersuisut kissaatigaat. Tamannalu ilaatigut avatangiisinik misissuinernit nalunaarusiatigut pissasoq, Naalakkersuisut tunsagassiutinut allagaanni allassimavoq.
Taakkua aamma allapput, aatsitassarsiorfimmik inuiaqatigiinni avatangiisinilu piujuartussamik iluaqutaasumik sunniuteqartitsiviusumik ingerlatsinissaq pillugu inatsimmi piumasaqaataasup malinnginnissaa inatsisinut naapertuutinngimmat, tassani ilaalluni tamatuminnga qulakkeerisussamik misissuinernik misissueqqissaarnernillu suliaqanngitsoorneq.
