Pisortaqarfimmiit atuanngitsoortartut iliuuseqarfigineqarsinnaanngillat

maajip 18-at 2006 10:03

GU-mi ilinniartut atuanngitsuukulasartut kingullerpaamillu periarfissinneqartartut amerliartuinnavinnerat pisortaqarfimmiit massakkorpiaq qanoq iliuuseqarfigineqarsinnaanngilaq. Aatsaalli ukiut marluk qaangiuppata GU-p nutarterneqarnerani inatsisissaq atuutilissasoq Ilinniartitaanermi naalakkersuisup Doris Jakobsenip oqaatigaa.

- Ajoraluartumik ilinniartut akornanni taama ingerlasoqartarnerata takutippaa piumassuseq akisussaassuseqarnerlu annikippallaamik pigineqartoq, Doris Jakobsen oqarpoq.

Aperaarput pisortaqarfimmiit tigussaasumik qanoq iliuuseqarfigineqarsinnaanersoq.

- GU massakkut nutarterneqarpoq, inatsisissaq 2008-mi imaluunniit 2009-imi atulertussaavoq, tassani kalaallinut ilinniartunut tulluarsaaneq ingerlanneqarpoq, isumaqarpunga taanna ilinniartunut iluaqutaajumaartoq tassami periarfissat annertusineqartussaapput, Doris Jakobsen oqarpoq.

Taanna nangilluni nassuiaavoq aningaasanut inatsimmi nutaami inuttut ineriartornermut kiisalu imigassamut aanngajaarniutinullu ajornartorsiuteqarnermi ilinniartut katsorsartinneqarsinnaanerat periarfissinneqarsimasoq.

- Ilinniartut namminneq akisussaaffeqartussaapput, perorsarneqarnerli aamma tunngaviusinnaavoq. Ilinniartoq 18-liisimatinnagu angajoqqaat akisussaajuaannartussaapput, ilinniartulli angajoqqaani qimallugit illoqarfimmi allamiikkuni nammineersinnaanera piumassuseqarneralu apeqqutaajuaannarpoq, oqarpoq.

Doris Jakobsen aperaarput, Atuarfitsialaap eqqunneqarnerata kingorna ilinniartut ukiukilliartornerat malugineqartalersoq, ukiukitsunnguillu imminnut ilumut akisussaaffigissanersut.

- Akisussaaqatigiinneq pingaaruteqarpoq. Angajoqqaat qitornamik ilinniariartortinnissaat akuerisimagunikku taava akisussaaqataanissaat pingaartuuvoq, Doris Jakobsen oqarpoq.

Doris Jakobsen nammineq 1998-imi GU-mi naammassivoq.