Pisortaqarfik: Rubinit iluanaarutigineqarsinnaanerat ungasippoq
Nuup nunaqarfiata Qeqertarsuatsiaat eqqaanni ujaqqamik erlinnartumik rubinimik anngajaamik nassaartoqaqqammerpoq, tamatumalumi nalaa peqarluarpoq, rubinilli suliarinissaat imaanngaanngitsuummat maannangaaq isertitsissutigineqangaatsiarsinnaanerat ilimanaateqanngikkallartoq, aatsitassanut pisortaqarfimmi pisortaq Hans Christian Schønwandt oqarpoq.
- Qeqertarsuatsiaat eqqaanni qanoq annertutigisumik rubineqartiginera oqaatigiuminaappoq, ulloq manna tikillugu qilleraluni annerusumik tigusisoqarsimanngimmat. Hans Christian Schønwandt nassuiaavoq.
Canadamiut suliffeqarfiat True North Gems Qeqertarsuatsiaat eqqaanni aasarmanna kingumut misissuivoq, pingaartumillu rubinit soqutigisaralugit. Canadamiut sulinerminni innuttaasunik qanimut suleqateqarput, ilaatigullu kalaallinik marlunnik sulisoqarlutik. Kalaalerlumi rubinimik aatsaat taama atsigisumik pitsaatigisumillu nassaarpoq, inussanik marlunnik atsisumik, taaguuserpaalu: Aappaluttoq.
Piaanissarli ajornaanngitsuinnaanngitsoq aatsitassanut pisortaqarfimmi pisortap erseqqissaatigaa:
- Rubineqarfiit nalinginnaasumik qaarsumi 2 meterinik isorartutigisumiittarput, pitsaassusaallu apeqqutaallutik qaqutiguugaluartumik 100 meterit tungaannut annertutigisumi sapanngatut nuisatut siaarsimasinnaasarput, nunap sananeqaatai aalajangersimasut akornanniillutik. Piianissarli ajornaatsuinnaanngilaq, pitsaalluinnartunillu nassaarnissaq qaqutigoorluni. Aatsitassanut pisortaqarfiup pisortaa nassuiaavoq.
- Ima ajornanngitsigisumiissimagaluarpata nunap qaani tigusariaannaallutik qangarsuarli taqqavunngareersimassagaluarpunga. Taamali ajornanngitsiginngilaq, piiaaneq suliarujussuuvoq, qanorlu iliornissaq ilisimaqqissaartariaqarpoq. Aamma rubinit aappilluaarissut ikittuinnaammata imaannaq iluatsitsinissaq ilimanaateqanngilaq. Taamaattumik siunissami qaninnerusumi iluanaaruteqangaatsiartoqarsinnaanera ilimanaateqanngikkallarpoq. Aatsitassanut pisortaqarfimmi pisortaq naliliivoq.
Canadamiut suliffeqarfiat True North Gems Qeqertarsuatsiaanit aasaq manna aallaqqammerpoq, ujaqqallu 15 tonsit misissugassatut Nunatsinnit anninnissaannik akuersissuteqarput.
Misissuinissamut akuersissut piiaanissamullu akuersissutit assigiinngitsuupput, tamarmillu immikkut qinnuteqaatigineqartussaallutik. Aamma misissugassatut tigusat tunineqassappata pisortaqarfik pinngitsoornani ilisimatinneqaqqaassaaq.
