Pisortaqarfik: Qilalugartassiinissaq pissusissamisut ingerlavoq
Qilalugartassiissutissat Namminersornerullutik Oqartussanit suliarineqarnerat Aalisartut Piniartullu Partiiata utaqqikatallugit ataasinngormat uparuarpai, allaallu Inatsisartut ombudsmandiata akuliutitinneqarnissaa inassutigalugu. Qilalugartassiinissamulli maleruagassat malinneqartut, Aalisarnermut Piniarnermullu Pisortaqarfik akissuteqarluni allappoq.
Aalisartut Piniartullu Partiianni siulittaasup tullia Pavia Nielsen ataasinngormat allappoq, qilalukkanik qaqortanik qernertanillu pisassiinissaq 2007-2008-mut tunngasoq juulip aallaqqaataanit pisussaagaluaq kinguarsarneqartuartoq, ullunilu makkunani tusarniaaneq suli ingerlanneqarmat aatsaat juulip 18-ata kingorna pisassiisoqassasoq.
Tamanna pillugu Aalisarnermut Piniarnermullu Pisortaqarfik akissuteqarluni allappoq, qilalukkanik qaqortanik qernertanillu illersuineq pillugu nalunaarut § 3, imm. 6 pisassiissutinik inaarutaasumik agguaanissamut aalajangersimasumik killiliiffiunngitsoq, taamaallaalli ukiumik pisassiiffiusumik tassalu juulip aallaqqaatanit juunip 30-anut taaguiffiusoq.
Qilalukkanik qaqortanik qernertanillu pisassiissutissanik aalajangersaasarneq agguaasarnerlu pillugit Pisortaqarfimmit suleriaasiliussani naalakkersuinikkut sulinerit kiisalu tusarniaasarnerit ukiumit ukiumut assigiinngiiaartartut apeqqutaasarput. Taamaattumik pisassiissutinik agguaanermut ullormik aalajangersimasumik taasaqarluni aalajangersaasoqarsinnaanngilaq nalunaarummilu aamma taamaaliortoqarani. Pisortaqarfik allappoq.
Pisortaqarfiup aamma erseqqissaatigaa, Qaanaap Upernaviullu kommunianni pisassiisoqarallarsimasoq, inaarutaasumik pisassiinissap tungaanu, taamaattumillu inaarutaasumik pisassiisoqannginnera kommunini taakkunani piniartunut sunniuteqanngitsoq. Taamatuttaaq qilalukkat aasaanerani kiujataaniinneq ajormata kujataani piniartut eqqorneqanngitsut.
Tusarniaanermi akissuteqarnissamut piffissaliunneqartoq ullumimut killeqarpoq. Tamatuma kingorna pisassiissutinik inaarutaasumik agguaaneq juulip 20-ani naammassissangatinneqartoq, Aalisarnermut Piniarnermullu Pisortaqarfik allappoq.
