Pisortaqarfik nutaaq eqqarsaatigineqarpoq

marsip 13-at 2006 15:22

Naalakkersuisut nutaamik pisortaqarfiliorniarlutik eqqarsarput, allanngortiterinermilu Namminersorneq pillugu pisortaqarfiup atorunnaarsinneqarnissaa eqqartorneqassaaq.

Pisortaqarfiit allanngortiterneqassanersut suli aalajangiisoqanngikkaluartoq pisortaqarfiup nutaap inuussutissarsiornermut suliffeqarnermullu tunngasut ilanngullugit suliarisassanerai misissorneqassaaq.

Pisortatigoortumik nalunaaruteqartoqanngikkaluartoq radioavisimit oqaloqatigisimasagut tamarmik nalunaarput suliassat agguataarneqarnissaat maanna oqallisigineqalereersoq.

Namminersorneq pillugu pisortaqarfik isornartorsiorneqartuarpoq. Pisortaqarfiup ukiumut 11 million koruuninik naleqarnera piffissap ingerlanerani apeqquserneqartarpoq. Assersuutigalugu Atassutip piumasarisimavaa pisortaqarfiup ingerlanneqarnerani aningaasat sumut atorneqartarnersut nassuiaasiortoqassasoq.

Novembarimi qinersinerup kingorna Namminersorneq pillugu pisortaqarfiup suliassai naalakkersuisut allattoqarfiata ataanut inissinneqarput, massakkullu pisortaqarfiup atorunnaarsinneqarnissaa ilimanarsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq