Pisortaq: Tusagassiuutit aqqutigalugit eqqartuisariaqanngilagut
Nunatsinni aalisakkanik tunisassiornermi tunisinermilu akit nunanut allanut sanilliullugit assersuunneqarsinnaanngitsut, Paaviaaraq Heilmann oqarpoq.
- Soorlu nunatsinni sanaartornermi aningaasartuutit qaffasinnerupput, orsussaq, imeq innaallagiarlu akisunerupput aammalu assartuinermut aningaasartuutit, niuerfinnullu aqqutip takinera aningaasartuutaanerulluni.
-Aamma ersarissumik oqaatigisariaqarpoq Royal Greenlandimiit akit nammineerluta aaliangersugarinnginnatsigit, tassa saarulliit assersuutigigai tusaagakku oqaatigisariaqarpoq KNAPK-mut saarulliit akii pillugit isumaqatigiissuteqarpugut.
Taavalu aamma minnerpaaffissanut aaliangersagaqarpoq, malittarisassanik Namminersornerullutik oqartussaninngaanniit aaliangersakkanik, aalisakkat imatut imatullu angitigisut taamaallaat pisarineqarsinnaallutillu tunineqarsinnaapput. Taama oqarpoq Royal Greenlandip pisortaa Paaviaaraq Heilmann.
