Pisortaq tunuarpoq

Per Rosing-Petersenip Ilulissat qimareerpai, Nuummullu nooreerluni, atorfimminilli aatsaat marsip aallaqqaataani tunuarniarluni ilisimatitsivoq.

- Suliassakka maani Nuumminngaanniit isumagisinnaavakka, Per Rosing-Petersen Radioaviimut oqarpoq.

Taamaattorli taassuma aqqa, assinga attavigineqarsinnaaneranullu paasissutissat, Destination Avannaata nittartagaanit ualimut peerneqareersimapput. Nittartakkamilu oqaatigineqarluni takornariaqarnermik ineriartortitsinermi pisortaq Konrad Seblon pisortaagallartussatut ivertinneqarsimasoq.

Konrad Seblonip, Danmarkimi maanna angalasup, tamanna uppernarsaarpaa, taamaattorli oqaaseqarfiginagu sooq Per Rosing-Petersen marsip aallaqqaataata tungaanut pisortatut atorfeqareersoq, paarlallugu pisortaagallartutut inissinneqarsimanerluni.

Pisortat nikinnerat, Ilulissani Destination Avannaata allaffeqarfianit ualimut oqaaseqarfigiumaneqanngilaq.    

Per Rosing-Petersenip oqaatigaa, Destination Avannaani aaqqiagiinngittoqalerneranut patsisaasoq, Qaasuitsup Kommuniata inuussutissarsiutinik ineriartortitsineq nammineerluni isumaginialermagu, taamaalillunilu Destination Avannaata takornariartitsineq kisiat isumagisussanngorlugu.

Kommunip allaffianit oqaatigineqarpoq, Destination Avannaata isumagisassaanik ippassaq allanngortiterisoqartoq. Siunissami inuussutissarsiutinut tunngasut Inuussutissarsiornermut, Aatsitassanut Takornariartitsinermullu ataatsimiititaliamit isumagineqartalissapput.

Qaasuitsup Kommuniani borgmesterip Jess Svanep pisortat nikinnerat oqaaseqarfiumanngilaa, aamma Destination Avannaata siulersuisuini siulittaasoq Timooq Mølgaard oqaaseqartinniaraluaratsigu iluatsinngitsoorparput.