Pisortaq sulisuminik mamarliinerarpaat
SIK, AK DJØF-ip Fællesklubbialu tusagassiuutinut nalunaarumminni oqaatigaat, Inatsisartut Allattoqarfiani pisortap kinguaassiuutitigut kanngutsaatsuliornermut tunngatillugu tusagassiuutinut nalunaarutigisimasaa sulisorisaminik mamarliiniarnerusoq.
- Eqqartuussivik aalajangiisimatinnagu kinaluunniit unnerlutuigineqartoq pisuussuteqanngitsutut isigineqartariaqarmat erseqqippoq, taamatulli aamma erseqqitigaaq sulinermut atatillugu pinngitsaalillugu atoqatigineqartoq allatulluunniit atoqateqarnermut assingusumik nikanarsagaasoq suliffigisap tusagassiorfitsigut nalunaarummik nassiussineratigut "misigisanik eqqaamasalersaarnerarlugu" "mamarliiniarnerarlugulu" pisuutinniarneqarmat. Sulisut peqatigiiffii pingasut nalunaarutaanni taama allaqqasoqarpoq.
Inatsisartut Allattoqarfiat tusagassiorfitsigut nalunaaruteqarnermigut pisortani sulisitsisutut pisussaaffimminik sunginnaasimavoq. Inuttullu misikkarissuseq eqqarsaatigigaluguttaaq sulisorisamut pisimasumik imaannaanngilluinnartumik misigisaqarsimasumut innarlerneqariaannaasumullu tamanut ammasumik ilaleruminaatsumik misigittaatsumillu Inatsisartut Allattoqarfiat saassussinermigut sumiginnaasimavoq.
Sulisut peqatigiiffii nalunaaruteqarnerminni inuit tamarmik, sulisorisallu suliffimmut, minnerunngitsumillu tassani pisortaasumut tatiginninnerat pilersinneqaqqeqqullugu Inatsisartut Allattoqarfiat kaammattorumavaat.
