Pisortaq: Royal Greenlandip aningaasarliornera Finn Karlsenip ilisimareerpaa
- Royal Greenlandip aningaasatigut atugai pillugit naalakkersuisunut ilaasortaq ilisimatittuarsimavara, Finn Karlsenip Aalisarnermut, Piniarnermut Nunalerinermullu naalakkersuisoqarfimmi pisortarisimasaa, Amalie Jessen oqarpoq.
Oqaatigaattaaq Finn Karlsen Royal Greenlandip januaarip ulluisa 27-anni ataatsimeersuarnerani aamma peqataagami, ingerlatseqatigiiffiup aningaasaqarnera sukumiisumik nassuiaassutigissutigineqarmat ajornartorsiornera paasisimassagaa.
Taamaakkaluartoq Finn Karlsen AG-mut oqarpoq, Royal Greenlandip aningaasaqarnera qanoq ajortigisumik inissisimasoq nammineq ilisimanagu.
- Arlaleriarlunga apeqqutigaara pisortaanermut Peter Schultzimut aamma Ingerlatseqatigiiffinnut Allaffimmi atorfilittamut, Royal Greenlandip aningaasarliornera sooq uannut isertuunneqarsimanersoq. Imminut qiviarput akinatillu, Finn Karlsen oqarpoq.
Royal Greenland qanoq annaanniarneqarsinnaanersoq misissussallugu suleqatigiissitaq, naalakkersuisunut siulittaasup naalakkersuisoqarfianit pilersinneqartup, Royal Greenlandip landskarsimit koruuninik milliardit affaannik aningaasaliiffigineqarnissaa ilaatigut inassutigisaa qanittukkut inatsisartut aningaasanut ataatsimiititaliaanit akuerineqarpoq.
Naalakkersuisoqarfimmi pisortaq Amalie Jessen suleqatigiissitaliamut ilaasortaavoq.