Borgmesterip, Palle Jerimiassenip, Avannaata Kommuniata kommuninngornerata kingorna Qaanaaq perngaammik tikeraartussanngorpaa.Assi: Laura Aggernæs/KNR

Pisortaq: Qaanaami ilaqutariinnut sullissineq pitsaanerusinnaavoq

Borgmesterip, Palle Jerimiassenip, Avannaata Kommuniata 2017-imi kommuninngornerata kingorna Qaanaaq perngaammik tikeraartussanngorpaa.

Qaanaami meeqqanik atornerluisoqarsimatillugu kommunimut nalunaarutiginninnerit ikippallaarput.

Avannaata Kommunia taama nassueruteqarpoq.

Taamaammat qitiusumi allaffimmeersut borgmester Palle Jeriemiassen siuttoralugu kommunip illoqarfiisa avannarlersaannut tikeraarnialerput.

Tikeraarnermi kommunip isumaginninnermi sullissinerani periaatsit sukaternissaat siunertaavoq.

Tamannalumi pisariaqarsimasoq, kommunip isumaginninnermut ilinniartitaanermullu pisortarigallagaata nassuerutigaa.

Assersuutigalugu meeraq kinguaassiutimigut atornerlunneqarsimatillugu, kommuni suliamut kingusippallaamik akuliuttarsimavoq.

- Arlaatigut pisoqarsimappat napparsimmavimmiit nalunaarusiortoqaraangat, politiit aatsaat paasisarpaat. Suliffitsinnilu nalunaarusiortarneq pitsaanerusinnaasutut taakkartorneqarmat, Qaanaamut suliariartussavarput, Avannaata Kommuniata ilaqutareeqarnermut ilinniartitaanermullu pisortarigallagaa, Aka Grønvold oqarpoq.

Tassalu pisortaagallartoq naapertorlugu meeqqanik atornerluisoqarsimatillugu nalunaarusiat ikippallaarput.

AAMMA ATUARUK Qaanaami atuareernermi ornittagaq illumik ataatsimik ilaneqartoq

 

-  Kommunimut anngussat ikippaallaarput, taamaalilluta nalunaarusiorsinnaanerput killeqarluni. Peqqinnissaqarfik kisiat isumalluutiginagu aamma kommunimi ilaqutareeqarnermut ingerlatsivimmi  suliassat pimoorullugit tigusariaqaratsigit nukittorsaasariaqarpugut, Aka Grønvold oqarpoq.

Innuttaasunik sullissinerup nukittorsarnerisa saniatigut, aamma innuttaasut qanoq ittunik pisinnaatitaaffeqarnerinik paasissutissinnissaat pisariaqartoq, Aka Grønvold oqarpoq.

- Meeqqat pisinnaatitaaffiisa illersorneqarnissaat Qaanaami aamma nukittorsagassaavoq, taakkulu nukittorsarneqassappata ilaqutariit tamarmik oqaloqatigineqartussaapput.

Borgmesterip Palle Jerimiassen atorfilittallu decembarip aqqarnaniit 14-iata tungaanut Qaanaamiissapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat