Pisortaq: Passutassaq toqugaangat soorunami nuannerneq ajorpoq

-Upernaviup pigisaani nunaqarfimmi Tasiusami angutip utoqqaap peruluttuni aallaqqunneqannginermi kingunerisaanik Upernavimmi napparsimavimmut kingusinaarluni apuunneqareerluni toqunerata kingorna, Peqqinnissaqarfimmi pisortaq, Ann Birkekær Kjeldsen oqarpoq.

Qanoq pisoqarsimanerup nalunaarusiarineqarnera pisortap pissarsiarisimalerpaa, atuarneranilu paasivaa pisimasoq nakorsanik ajunngitsumi ingerlanneqarsimasoq.

Pitsaanerusinnaasimanngila?

- Pisimasut kingumut qiviassagutsigit, soorunami napparsimasoq siusinnerusukkut aaneqarsimasariaqaraluarpoq - pisup nalunaarusiarineqarnerani atuarsinnaavara, piumasaqaatit malillugit nunaqarfimmut napparsimasumik aallinnginnermi attaveqartoqarsimavoq,

Ann Birkekær Kjeldsen oqarpoq.

Tasiusami napparsimasunik sullissisup piumasaa sooq nakorsamit malinneqarsimannginnersoq aamma akisinnaannginnerarpaa.

- Nalunaarusiami atuarpara aammalu paasisakka malillugit takusinnaavara, sooq erngiinnaartumik napparsimasoq aallarunneqarsimannginnersoq. Napparsimasumik aallarussisoqassatillugu aammalu aallarussisoqarnissaanik nalunaareernermi malittarisassaqarpoq nakorsap naliliiffigisassaanik. Nalunaareernermi nakorsaq malittarisassat malillugit iliorsimavoq, Ann Birkekær Kjeldsen oqarpoq.

Nakorsap suliassani eqqortumi suliarisimanerai nalilersinnaannginnerarpaa.

- Qujanartumik uanga naliligassarinngilara pisimasoq ajunngitsumik ingerlanneqarsimanersoq, aamma nunaqarfimmiut tamanna naliligassarinngilaat. Tassami napparsimasumik aallarussisoqassatillugu nakorsaq kisimi naliliisinnaavoq. Taamaaliortoqartarneralu Napparsimaveqarfimmiit attatiinnartariaqarparput, oqarpoq.

Ataaserli qularnanngitsoq Peqqinnissaqarfiup pisortaata qularinngilaa.

- Upernaviup napparsimaveqarfianut piumasaqaataavoq annertoorujussuaq nunaqarfiit quligiluat sullisissallugit, ingammik eqqarsaatigalugu, Upernavimmi eqqaanilu innuttat amerlanersaat nunaqarfinni najugaqartuummata.

Nunaqarfinni innuttat nunaqarfiillu kattuffiinit oqaatigineqarpoq napparsimaveqarfik nunaqarfinni innuttaalluni toqqissisimananngitsoq. Taamatut oqarneq Ann Birkekær Kjeldsenip paasisinnaannginnerarpaa.

- Nunaqarfimmiunit oqaloqateqarnitsinni paasitinneqarsimasariaqaraluarpugut Napparsimaveqarfiup nunaqarfimmut sullissinera aaqqitassaanersoq. Nunaqarfimmiut oqaloqatiginerini paasinarpoq taakku sullissinerput ajorinngikkaat, naggasiivoq.