Pisortaq: Aningaasaliissutit misileraanernut atornerusariaqarput
Ikummatissamimmi annikinnerusumik atuinikkut CO2-mik aniatitsineq annikillisinneqarsinnaavoq; iluanaarutaasinnaassasorlu pisortap Flemming Knudsenip qularutiginngilaa.
- Royal Greenlandimi aalisariutaativut suliffeqarfiutivullu nukimmik annertuumik atuipput. Unammilleqatigiinnermi pingaarpoq aningaasartuutitta sapinngisamik appasinnerpaaffissaaniitinnissaat, Royal Greenlandip pisortaa Flemming Knudsen nassuiaavoq.
Ikummatissamik annikinnerusumik atuinerulerutta pinngortitaq asattuunnerulissavarput. Maannakkorpiaq Royal Greenland ikummatissamik sipaarutaasinnaasunik atortorissaarutinik Danmarkimi misileraavik
suleqatigaa.
- Kilisaatit raajarniutit ikummatissatoqaat, qalorsuarnik oqimaatsunik kalittaramik. Taamaammat qalorsuit kalinnerinik ikummatissartornannginnerusunik misileraasut Danmarkimiittut suleqatigaavut.
Flemming Knudsen isumaqarpoq aalisarnermi aningaasaliissutit annerpaartaat, atortunik ikummatissatornannginnerusunik, issittumut naleqqussakkanik misileraanernut atorneqartariaqartut.
- Isumaqarpunga aningaasaliissutaasartut aalisarnermi ajornaallisaaniarnernut misileraanernut atorneqartariaqartut. Taamaalilluni aalisarneq pissarsinarnerusumik ingerlasinnaalissaaq; ikummatissatornannginnerusumillu ingerlatseriaaseq ajornannginnerusumik anguneqarsinnaalissalluni.
Aalisarnerup, kiffartuussinerillu ingerlannerini nunatsinni ikummatissap affaa atortarpaat. Naatsorsorneqarsinnaavorlu CO2-mik aniatitsinerup 15 procentia aalisarnermi aniatinneqartarnera.