- Pissutsit (Nuummi pinerluttunik inissiisarfimmi aaqq.) sammiveqanngissinnaaneranik oqartoqarnera ilisariuminaatsippara. Isornartorsiuisoqarnera akisussaaffigissavarput, isornartorsiuinerilli piviusuussapput, pisortaq oqarpoq.Assi: KNR

Pisortap pinerluttunik inissiisarfiup isornartorsiorneqarnera ilisarisinnaangikkaa

Nuummi pinerluuteqarsimasunik inissiisarsimmi pissutsit inissinneqarsimasunut sulisunullu isornartorsiorneqangaatsiarput. Nunatsinni pinerluttunik isumaginnittut pisortaata ajornartorsiutit taama annertutiginnginnerarpai.

Nukittunerit aqutsisuunerat, pissutsit sammiveqanngitsut hashimillu tuniniaanerup unammillernangaatsiarnera.

Nuummi pineqaatissinneqarsimasunut inissiisarfimmi nutaami, ukiup ataatsip matuma siorna qaangiuttumi ammartumi ajornartorsiutit ilaat tamakkuupput.

Aviisimi ullormut saqqummertartumi Politikenimi allaaserineqartumi illuatungeriit qassiiusut matumani Parnaarussiviit kattuffianni, Fængselsforbundimi allatsi René Larsen ilanngullugu pineqaatissinneqarsimasunut inissiisarfimmi pissutsinik isornartorsiuingaatsiarput. 

AAMMA ATUARUK Pineqaatissinneqarsimasut Nuummiikkusunngitsut

Isornartorsiuinerulli ilarujussua eqqunngitsoq, nunatsinni pinerluttunik isumaginnittut pisortaat, Naaja Nathanielsen isumaqarpoq.

- Pissutsit (Nuummi pinerluttunik inissiisarfimmi aaqq.) sammiveqanngissinnaaneranik oqartoqarnera ilisariuminaatsippara. Isornartorsiuisoqarnera akisussaaffigissavarput, isornartorsiuinerilli piviusuussapput, pisortaq oqarpoq. 

Naaja Nathanielsen, Pinerluttunik Isumaginnittoqarfiup pisortaa Naaja Nathanielsen, Pinerluttunik Isumaginnittoqarfiup pisortaa

- Amerlasuunik nutaanik sulisoqalernikuuvugut, sulilersullu tamarmik ilisimasassaminnik piginnaasaqarnikuunngillat. Sulisulli inissinneqarsimasulluunniit - pisinnaatitaaffiinnik unioqqutitsisoqannginnera malittarisassallu tamarmik malinneqarsimanerat oqaatigissallugu pingaaruteqarpoq, Naaja Nathanielsen KNR-imut oqarpoq.

Nukittunerusut aalajangiisartut

Pisortap oqarnera naapertorlugu ’aallarteqqaarnermi unammillernartut’ ajornerpaat maanna qaangerneqarsimapput, pinerluttunillu isumaginnittoqarfimmi maanna pitsaasumik ineriartortoqarluni.

Pineqaatissinneqarsimasunut inissiisarfimmi nakkutilliisut amigarnerat misilittagakinnerallu pillugu unammillernartoqangaatsiartoq KNR-imit siorna ilanngutassiarineqarpoq.

Ajornartorsiutit taakku Fængselsforbundimit René Larsenip oqarnera naapertorlugu suli ajornartorsiutaapput – maannalu siusinnerusumit immaqa ajornartorsiutaanerungaatsiarnerullutik.

- Ajornartorsiutit pinerluuteqarsimasunut inissiisarfimmi sulisussaasut affaasa amigaataanerannik sulisullu amerlangaatsiartut ilinnialeruttornerannik pissuteqarput, taanna oqarpoq.

AAMMA ATUARUK Lektori: Nunatsinni ikorfartortissaaleqineq ajornartorsiutaavoq

- Nukittunerusut ullormut aqutsilernissaannut aarlerinartoqarpoq. Inissinneqarsimasut nukittunerusut aalajangiisunngussapput. Tamanna aalajangiullugu oqaatigisaavoq, pissutigalugu sulisut annilaangallutik misilittagakillutilluunniit tunuarsimaarnertik pissutigalugu nalunaarsuinngikkunik tamanna uppernarsarsinnaannginnakku, kattuffiup allattaa KNR-imut oqarpoq.

Taassuma isornartorsiuinini pinerluuteqarsimasunut inissiisarfimmit nalunaarutiginninnerit nammineerlunilu Nuummut tikeraarnerminit tunngavilerpaa.

René Larsenip pissutsit imaannaanngingaatsiartut Politikenimut siorna oktobarimi oqaatigaa, danskillu sullivinnik nakkutilliisuata pissutsit misissoraluarunigit inissiisarfik matussagaluaraa isumaqarluni. Allatsi suli taama isumaqarpoq.

Taamali nalunaaruteqarneq Naaja Nathanielsenip ilorrisimaarutiginngiivippaa.

- Nunatsinni Sullivinnik aamma nakkutilliiveqarnerput erseqqissarusuppara, neriuppungalu Parnaarussiviit kattuffiata tamanna aamma ilisimagaa. Taakkulu pissutsinik ilungersunangaatsiartunik nassaarsimassagaluarunik, pisariaqarpat piginnaasatik atorlugit inissiisarfimmik matusissagaluartut nalunngilara, Naaja Nathanielsen oqarpoq.

Oqaatigineqartut ilisarisinnaanngikkai

René Larsenip pineqaatissinneqarsimasut Danmarkimi pissutsit eqqissisimanerunerat pissutigalugu uteqqikkumasut qularutiginngilaa.

Taassuma ajornartorsiutit annerungaatsiarlutillu piviusuusorai, taakkulu sulisussaaleqinermeersoralugit.

- Sulisussaaleqisoqarnera piviusorsiortuuvoq. Inissiisarfimmi nakkutilliisut 49-sussaapput, nakkutilliisut 28-t 30-llu akornanniipput, taakkunanngalu 20-t ilinniartuullutik. Tamannalu ajornartorsiuteqartitsissanngikkaluarpat tupinnassagarluarpoq, René Larsen oqarpoq.

AAMMA ATUARUK Fængselsforbund: Tiltrængt aftale for anstaltsbetjente

Naaja Nathanielsenip pinerluuteqarsimasunut inissiisarfimmi sulisussaqarniarnermi suli unammillernartoqarnera nassuerutigaa. Nakkutilliisulli amigaataanerat pissutsinik sammiveqanngitsitsinera itigartitsissutigaa.

Nuummi pineqaatissinneqarsimasunut inissiisarfimmi nukitunerit aqutsisuunerat hashimillu nioqquteqarnerup ajornartorsiutaangaatsiarnerat, tamannalu pineqaatissinneqarsimasut Danmarkimut uteqqikkusunnerannut pissutaasinnaasoq qassiusut oqaatigaat. Ajornartorsiutit taakku ilisarisinnaanngilluinnarpigit?

- Pissutsit taamaattutut isiginngilakka. Tamanna nunatsinni nakuusertoqartarnerata siorasaarisoqartarneratalu Danmarkimit annikinneruneranut tunngaveqartippara, pisortaq oqarpoq.

- Soorunami pineqaatissinneqarsimasunut inissiisarfinni tamani qullersaqarlunilu allersaqartarpoq. Kisianni nalinginnaasumik nukittunerusut aqutsinerat hashimilluunniit nioqquteqartoqarnera pissutsillu sammiveqannginnerat tamakku ilisarisinnaanngilluinnarpakka, Naaja Nathanielsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat