Pisortanut akiitsut ikilisarneqarusuttut

Pisortanut akiitsoqarpit? Taamaappat aningaasarsinnginninni Ilanngaassivikkut ilanngaatsittalernissat qanilliartorpoq.
juulip 29-at 2019 05:53

Ilanngaassiviup 2021-p aallartinneraniit atuutilersinneqarnissaa Naalakkersuisunit sulissutigineqarpoq.

Inuiaqatigiit pisortanut 1 milliardit koruuningajannik akiitsoqarput, agguaqatigiisitsinermi nunatsinni najugallit tamarmik 18.000 koruuningajannik akiitsoqarlutik.

Akiliisarfik Ilanngaassivik tusarniutigineqareerpoq, inatsisissatut siunnersuut ukiaru Inatsisartut ataatsimiinnissaanni oqallisigineqassanersoq suli qulakkeerneqanngitsoq, aningaasaqarnermut naalakkersuisoq Vittus Qujaukitsoq aviisimut Sermitsiamut oqarpoq.

 Akiitsut ilaatigut makkuupput:
- Ineqarnermut akiliut.
- Ilinniartut inaannik attartornermut akiliut.
- Innaallagissamut, imermut kiassarnermullu akiligassaq.
- Ulluunerani paaqqinnittarfimmiinneq.
- Inuussutissarsiutigalugu piniarnermut allagartaq.
- Eqqaavilerinermut akiligassaq.
- Meeqqanut akilersuutit.
- Ilinniarnermi taarsigassarsianik utertillugit akiliineq.
- Kommunimit tunniunneqartut pillugit akiliinerit.
- Akileraarutinut akitsuutinullu piumasaqaatit allat.                                                                     Tigusiffik: Naalakkersuisut.

Oqallisigineqarpat allangortinnangulu akuerineqassappat pisortanut akiitsullit aningaasarsiamik tigunnginnerini ilanngaassivikkooqqaartarnissaat naatsorsuutigissavaat.

Inuttaasut amerlanerpaat akiitsoqartut

Innuttaasut 30.000-it missaanniittut Kalaallit Nunaanni minnerpaamik ataatsimik akilinngitsuukkamik akiitsoqarlutik nalunaarsorsimapput

Pisortanut akiitsoqarnerpaat tassaapput meeqqanut akilersuisut taakku 400 milliuunit koruunit pallillugit akiitsoqarput.

AAMMA ATUARUK Naalakkersuisut Ilanngaassivik pilersippaat

- Ilanngaassivimmut siunnerfiusoq pingaarneq tassaanngilaq akiitsut akilinngitsuukkat pioreersut akilersinniarneqarnissaat, kisianni nutaanik akilinngitsuukkanik akiitsoqalertarnerup pinngitsoorneqarnissaa siunnerfigineqarluni, Naalakkersuisut inatsisissatut siunnersuummi taama allapput.

Namminersortut pisassarisaat, innuttaasup akiligassai, soorlu oqarasuaammut angallattakkamut pisartagaqarneq, sillimmasiissutit, aningaaserivimmilu taarsigassarsiat Ilanngaassivik aqqutigalugu akilersinniarneqarsinnaanngillat. Aamma namminersortunut inissianik attartortitsisartunut aningaasartuutinut tamanna atuuppoq.

Siunnersuut makkuninnga pingaarnernik imaqarpoq:

  • Innuttaasut isertitaat Ilanngaassivik aqqutigalugu ingerlatinneqartassapput.
  • Pineqartunut ilaapput suliffeerunnermi ikiorsiissutit, ilinniagaqarnersiutit utoqqalinersiutillu.
  • Pisortanut akiitsoqaraanni akiliisitsisarnermi ilaasussaatitaasoqassaaq.
  • Innuttaasoq akileereernermini qaammammut minnerpaamik 4.000 koruuninik aningaasaateqartassaaq. Aappariilli 6.000 koruunit inornagit aningaasaateqassallutik.
  • Meeqqanik angerlarsimaffimmi najugaqartoqarpat aningaasat atorsinnaasat qaffanneqassapput.  innarluutillit pineqarpata, aningaasat atorsinnaasat qaffanneqassapput.

Tigusiffik: Naalakkersuisut

Ingerlatsineq akeqassaaq

Akiliisitsisarfimmik pilersitsiniarnermut aningaasartuutit 15 milliuunit koruuniunissaat naatsorsuutigineqarpoq, periuserli taanna atorneqalerpat ukiumut 9,5 milliuunit koruuninik amerlassuseqalernissaat naatsorsuutigineqarpoq.

Innuttaasoq akiliisarfimmi pineqartunut ilaassanersoq Akileraartarnermut ingerlatsivik aalajangiissaaq.

Tamanna pissaaq innuttaasoq pisortanut akilinngitsuukkanik akiitsoqarpat, ukiullu tallimat kingulliit iluanni akiitsunut akilinngitsuukkanut suliat minnerpaamik pingasuuppata.

Akiliisarfik taamaattoq Savalimmiuni ilisimaneqartoq, ukiunilu arlalinni iluatsittumik ingerlanneqarsimasoq, inatsisissatut siunnersuummi allaqqavoq.

Naalakkersuisut 2018-imi januaarip aallaqqaataanni Ilanngaassivik atuutilersinniarnikuugaluarpaat.