Pisortanut akiitsut 900 mio. koruuniulerput

NALILIINEQ: Innuttaasut nunatta karsianut akiitsorisaat sukkasuumik qaffakkiartorput maannalu 900 millionit koruunit pallissimallugit.
Allattoq Jens Thorin
apriilip 24-at 2014 12:03

Aningaasaqarnermut naalakkersuisoq Vittus Qujaukitsoq aningaasaqarnikkut ingerlatsineq pillugu nalunaarusiamik namminerluinnaq allakkaminik siullermeerluni ullumi saqummiussissaaq. Siorna saqqummiussaata ilarujussua siuliata Maliina Abelsenip allagaraa.

Nunattalu aningaasaqarnera pillugu nassuiaassalluni maanna ajornaatsuinnaassanngilaq. Ingammik massakkut, paasissutissat nutaat takutimmassuk, innuttaasut Nunatta Karsianut akiitsui ukiup ataatsip ingerlanerinnaani 50 millionit koruuninik amerlisimasut.

Akileraarutinik akiligassaqaruit imaluunniit ineqarninnut, imermut innaallagissamulluunniit akiliinngitsoorsimaguit, immaqaluunniit meeqqanut akiliutit akilinngitsoorsimagukkit, taava aningaasaqarnermut naalakkersuisup akiitsulinnut allattugaataaniipputit.

Vittus Qujaukitsullumi Nunatta Karsiani aningaasaatit qissimigaarlugit siunissami iliuusissatut pilersaarutit aningaasaqarnikkut ingerlatsineq pillugu nalunaarummi saqqummiuppagit, innuttaasut pisortanut akiitsuisa amerliartuinnarneri initussapput.

Pissutsit ullumikkutut iinnassappata, Nunatta inuisa Nunatta Karsianut akiitsup qanittukkut 1 milliardit koruuninngussapput. Maannakkorpiaq 899 millionit koruuniupput, ukiullu ataatsip ingerlanerinnaani 50 millionit koruuninik amerleriarsimallutik. akiitsullit tamarmik ataatsikkut akiliigaluarpata, atuarfinnik 45-nik nunaqarfinnilluunniit oqaluffinnik 90-inik sanasinnaagaluarpugut.

Aningaasaqarnermullu naalakkersuisoq, Vittus Qujaukitsoq, aaqqiissutissanik atorluarsinnaasunik saqqummiussinissaa naatsorsuutigineqarpoq.

Aammali aningaasaqarnikkut ingerlatsineq pillugu nalunaarusiamini erseqqissarpaa, aningaasaliissutissat 175 millionit koruuninik Naalakkersuisut siuartimmatigit, taavalu aamma sulifissaqartitsiniarnikkut sukaterissallutik, kiisalu ukiut utoqqalinersiuteqalerfiit qaffanneqassasut.

Innuttaasut akiitsuisa, maanna 900 millionit koruuniusut, amerligaluttuinnarneri  piitsuussusermik tunngaveqarpata, isertitaqarnerusut akileraarnerulersinnissaat, Vittus Qujaukitsumut isumaliutigeqqajaanarsinnaassaluarluaqqooqaaq. Kisianni Siumut, Atassut Demokratillu ukiuni amerlasuuni isertitat procentiinik assigiimmik akileraartoqartarnissaa aalajangiusimavaat. taamaalillutalu nunarsuarmi nunat allat ikittuinnaat tamatumuuna assigaagut, soorlu Saudi Arabia, Rusland aamma Albania.