Pisortanut akiitsoqarpit?
2010-miit 2011-mut kalaallit akiitsui ullormut 131.000 koruuninik amerleriartarput.
Naak kisitsit angigisassaagaluartoq 2008-mut sanilliutissagaanni suunngillat, taamanimi innuttaasut akiitsui ullormut 243.000 koruuninik amerleriartarmata.
Innuttaasut qanoq akiitsoqartiginersut nassuiaatigilluarneqarsimavoq. Nassuiaallu uanga kommuunit peqatigalugit innuttaasut akiitsuinik qanoq ikilisaasinnaanissamut najuqqutarissallugu pitsaalluinnarpoq. Aningaasaqarnermut naalakkersuisoq, Maliina Abelsen tusagassiutinut nalunaarumminni taama allappoq.
Ukiuni kingullerni pitsanngoriaateqarsimanera naalakkersuisup nuannaarutigaa:
Isumaga naapertorlugu ilorraap tungaanut ingerlasoqarpoq. Sulili angisuunik suliassaqarpugut. Innuttaasummi akissaqaraluarlutik akiliiumanngitsut akiliisinniartariaqarpavut. Ilami nammineq akiitsorisat innuttaaqataasunut ingerlateqqiinnarneqarsinnaanngillat. Taamaammat inatsisinik allannguisoqassanersoq suliniutinilluunniit allanik sutigut periarfissaqarnersoq Kommuuninut ukiortaami oqaloqatigiissutiginiarpara. Maliina Abelsen naggasiivoq.
