Pisortamik ujarlerneq sivisooq
- Qaammatit marluk qaangiutsinnagit Royal Greenlandimut pisortassamik nassaartariaqarput, Copenhagen Business School-ip centeriani pisortaq Lise Lyck oqarpoq.
Lise Lyck isumaqarpoq. pitsaasumik pisortassamik Royal Greenland nassaarutissallugu ajornakusuussasoq. Royal Greenlandilu nunatta aningaasaqarneranut pingaaruteqarluinnartuusoq.
Isumaqarluinnarpunga pisortanngortussaq minnerpaamik pingasunik piginnaaneqartariaqartoq.
Siullermik aningaasaqarnermik ilisimasaqarluartuussaaq, niuernermi atugassarititaasunik ilisimasaqarluartoq nunarsuamioqatigiinnermillu ilisimasaqarluartoq, taamaalillunilu Kalaallit nioqqutissaataannik tuniniaasinnaassuseqassalluni. Aappaatigullu Kalaallit Nunaanni pissutsinik ilisimannilluartuusariaqarpoq, paasilluinnarsimassallugulu Royal Greenland suliffeqarfiusoq inuiaqatigiinnut pingaaruteqarluinnartoq inuppassuiarnillu napassutaasoq, taamatullu inissisimanera piumasaqaaterpassuarnik ilaqarpoq, soorlu tunisassiornerup qanoq ingerlalluarsinnaaneranik ilisimasaqarnissaq, kiisalu nunap iluani avataanilu tunisassiornermik ilisimaqarluni, minnerunngitsumillu inuttut piginnaassutsimigut aqutsillaqqissuusariaqarpoq, saqqumilaartoq attaveqarfigiuminartorlu, ilisimaqqissaassavaalu Royal Greenlandip suna siunnerfigineraa, Lise Lyck oqarpoq, aperineqaramilu pisortassaq piginnaasanik taakkartukkaminik pigisalik nassaarinissaa ajornannginnersoq ima akivoq.
Naamik pisariusorujussuuvoq, taamaammallu immaqa ujarlerneq sivisuvoq, aappaatigulli piffissaq pisortassamik ujarlerfigineqartoq sivisusinnaanngilaq, ujarlernerummi ajutoortinneqarsinnaasut amerlaqaat, Royal Greenlanditut ittumik aaqqissuussami ineriartorneq suup tungaanut ingerlanneqassanersoq ilisimaneqanngippat.
Pisortassamik ujarlerneq sivikitsuaraasariaqaraluarpoq, apeqqutaalluinnarporli taartissamik eqqortumik peqarnersoq, nalilersuinermilu ilaasariaqarpoq taartissaq eqqortoq nassaarineqarnersoq utaqqiisaasumillu pisortaqarneq qanoq sivisutigisumik ingerlanneqarsinnaanersoq eqqarsaatigineqartariaqarluni. Taakku oqaatigereerlugit isumaqarpunga qaammatit marluk qaangiutsinnagit pisortassamik nassaartoqareersimassasoq, Lise Lyck oqarpoq.
Novembarip aallaaqaataani 2006-imi Keld Askær nalunaarpoq ukiup naanerani pisortatut tunuassalluni.
Royal Greenlandimi pisortaagallartoq Paaviaaraq Heilmann ullumi ilisimatitsivoq pisortassaq marsimi toqqarneqarumaartoq.
