Pisortaaninngortussaq nersualaarneqarpoq

Namminersorlutik Oqartussat pigisaani Royal Greenlandimi pisortaanertut atorfimminit tunuarniarluni Flemming Knudsen aalajangersimavoq. Ullumikkut Flemming Knudsen 64-nik ukioqartoq ukiuni 40-ni inuussutissarsiornermi sulereerluni maanna suliffeqarfinni siulersuisuunertut inuussutissarsiuteqaannalerniarluni aalajangersimavoq.

Flemming Knudsenip taartigissavaa, ullumikkut ID-designimi pisortaanerusoq, Michael Thinghuus. ID-design ulluinnarni taaneqartarpoq IDÉ-møbler-imik. Idé Møbler illumut atortussanik pequtassanillu tunisassiorfiuvoq.

- Michael Thinghuus atorfimmut piukkunnarnerpaavoq. Eqqarsartaatsimigut pikkorissutsimigullu tamatigoortuuvoq. Royal Greenlandip ullumikkut suliffeqarfissuini nunani arlalinniittuni, pisortassaattut naleqqulluarluni. Aamma Thinghuus suliffigiligassaminut soqutiginnilluarpoq. Minnerunngitsumik atorfigisarsimasamini pitsaanerpaanik Michael Thinghuus angusaqartarsimavoq.

Royal Greenlandip siulersuisuunerini siulittaasup, Niels de Coninck-Smithip taama pisortaaninngortussaq nalilerlugu ilisaritippaa.

Aappaagu apriilip aallaqqaataatinnagu Michael Thinghuus pisortaanertut aallartissaaq.

Nunarsuaq tamakkerlugu Royal Greenland inunnik 2.000-inik suliffissaqartitsisoq ukiumut 4,5 milliard koruuninik kaaviiartitaqarpoq. Royal Greenlandip siulittaasuata oqaatigaa, suliffeqarfik maanna siumut aallalersoq, naak siusinnerusukkut Naalakkersuisunit milliardit affaanik aningaasaliiffigineqareeraluartoq aammalu nunarsuatsinni aningaasarliornerup kinguneranik eqqorneqarsimagaluartoq.

Royal Greenland atini nammineq atorlugu tunisassiortarpoq, aammali pisiniarfissuit ilisarnaataat ilisarnaasiutsillugit tunisassiortarluni.

Pisortanngortussap suliassaa tassaassaaq Royal Greenlandip aqqut eqqortoq atorlugu ingerlaveqalernissaa. Niels de Coninck-Smith ima oqarpoq:

- Taava siuttunut apeqqutaalerpoq, ilumut taamannak ingerlassaagut? Maannami Tysklandimi tunisassiorfipput ingerlalluaraluarpoq. Tunisassioriaatsit taakku marluk ilumut imminnut ataqatigiississanerlutigit isumaliuteqarnitsinni, pisariaqarpoq qarasarissumik aqutsisoqarnissaq, Niels de Coninck-Smith oqarpoq.

Royal Greenlandimi pisortaanerup tullia, Paaviaaraq Heilmann, Flemming Knudsen-itulli atorfinitsitaanermi isumaqatigiissut atuukkunnaarpat nutaamik isumaqatigiissusiorniarani nalunaarpoq, tassa tuuarniarluni nalunaarpoq.