Royal Greenland: Pisortaaneq soraarsitaalluni pisortaanerugallartumik atorfinitsisoqartoq

Susanne Arfelt Rajamandip Royal Greenlandimi pisortaanertut suleqatigineqarnerata ingerlaannartumik atuutilersumik taamaatinneqarnissaa, Royal Greenlandip siulersuisuisa tusagassiorfinnut nalunaarutigaat.

Susanne Arfelt Rajamand Royal Greenlandimi pisortaanertut 2023-mi februaarip aallaqqaataani pisortaaninngorpoq.

- Royal Greenland ukiuni kingullerni marlunni assigiinngitsorpassuartigut ajornartorsiortarsimavoq, maannakkullu allaanerusumik siuttoqarnissaa siulersuisut isumaqatigiillutik nalilerpaat, taamaattumik pisortaaninngortussamik nutaamik sulisussarsiornissaq aallartinneqarpoq. Susanne suleqatigisimaneranut qutsavigaarput, Royal Greenlandip siulersuisuisa siulittaasuat Maliina Abelsen tusagassiorfinnut nalunaarummi oqarpoq.

Assi © : Royal Greenland A/S

Preben Sunke pisortaanermik nutaamik nassaartoqarnissaata tungaanut siulersuisunut ilaasortaq pisortaanerugallassaaq.

Preben Sunke Forenet Kreditimi Nykreditimilu siulersuisunut siulittaasup tulliattut inissisimavoq Danish Crownimilu aqutsinermi ukiut 30-t sinnerlugit misilittagaqarluni.