Pisortaaneq atorfimminit soraarpoq

Sooq TELE Greenlandinimi pisortaaneq atorfimminit soraarnersoq pisortatigoortumik nassuiarneqanngilaq.
oktobarip 17-at 2011 15:30

- Isumaqatigiissutigineqarsimavoq suliunnaarnera oqaaseqaffigineqassanngitsoq, Brian Buus Pedersenip TELE Greenlandimi pisortaanertut sapaatip akunnerani kingullermi soraarneranit siulersuisut siulittaasuata Agner Markip oqaatigisatuaa taama nipeqarpoq.

Inuttaa nammineq soraarnini pillugu aamma oqaaseqarumanngilaq.

Napparsimallutit sulinngiffeqarallarninni pisortaagallartutut ivertitaagallartoqarsimavoq, napparsimanerit pillugu maanna suliunnaarpit?

- Tamanna oqaaseqarfigerusunngilara, Brian Buus Pedersen akivoq.

Brian Buus Pedersenip stressernini pissutigalugu qaammatini pingasuni sulinngiffeqarallarnissaa sulisunut qaammatip ataatsip matuma siorna nalunaarutigineqarpoq. Maannalu - napparsimalluni sulinngiffeqarallarneranit qaammat ataaseq qaangiutiinnartoq - Brian Buus Pedersenip TELE Greenland qimassallugu aalajangerpoq. Nammineq imaluunniit siulersuisut tamanna aalajangigarineraat pisortatigoortumik oqaaseqarfigineqarumanngilaq.

Suliffeqarfik ukioq kingulleq akileraarutit akilereerlugit 47,4 millioni koruuninik isertitaqartoq qimappaa. Ukiup siulianut naleqqiullugu 1,3 procentimik isertitaqarnerusimasoq.

Steen Montgomery-Andersen pisortaanerugallartutut siulersuisut ivertippaat.

Suliffeqarfik ukioq kingullermut sanilliullugu appasinnermik isertitaqartussaaneranik ilimagineqartoq aqulerpaa. Appasinnermik isertitaqarnissaanut internetip akikillinera allakkallu ikinnerit nassiunneqarneri peqqutaapput.

TELE Greenlandip ukiumoortumik nalunaarusiaani 2010-meersumi takuneqarsinnaavoq Brian Buus Pedersenip 2010-mi akissarsiai 2,78 millioni koruuniusimasut.