Pisoqqat peerlugit, nutaanilli!

Naalakkersuisut maanna siulittaasuat, Eva Aariak, qinersineq sioqqullugu ilisimatitsigaluarpoq, Eqalunni qinigassanngortikkaluarluni, naalakkersuisunut siulittaasunngoqqinnissani kissaatiginagu.

Taama nalunaaruteqarnini qinigaanngitsoorutigaa, inuusuttumut, George Hikes jr.-imut, Manitobameersumut, ajorsarami.

Nunavummili naalakkersuisunut 1999-imiit 2008-p tungaanut siullersaalluni siulittaasuusoq, Paul Okalik, qinigaalluaqaaq. Kingullermik qinersisoqarmat Nunavummi Inatsisartunut ilaasortaajunnaarpoq, maannali utertussanngorunarpoq.

Aviisimut Nunatsiaq Newsimut ullumi oqarpoq, naalakkersuisunut siulittaasunngoqqinniassanerluni suli aalajangiunnagu.

- Nunavummi Inatsisartunut ilaasortanngoqqinnera maanna nuannaarutigiinnarpara, Paul Okalik oqarpoq.

Politikerit Nunavummi qinigaaffimmi qaangiuttumi aqutsisuusimasut inuulluaqquneqarput.

Inatsisartunut ilaasortanit 22-nit arfinillit taamaallaat qinigaaqqipput.

Qinersivinni marlunni taasinerit inerneri naligiimmata kisitseqqittoqartussanngorpoq.

Nunavummi Inatsisartunut ilaasortat 22-t tamakkerlugit pissarsiarineqareerpata, suliassaat pingaarnerpaaq aallartissaaq: Tassa naalakkersuisunik nutaanik katiterinissaq.

Nunavummi Inatsisartuni parteeqanngimmat, Naalakkersuisut siulittaasussaat. ministerissallu assigiinngitsut, ilaasortat 22-t namminneq aalajangertussaavaat.

Politikkikkut aaqqiiniarneq novembarip aallartilaarnerani naammassissangatinneqarpoq.