Pisisartut piumasaat tuniniarpaat
Niuertarfiup Pisiffiup atisaarniarfiata Torrak Fashion-ip meeqqanut arfineq pingasunik ukiulinnut iviangequtinik tuniaanini nittarsaassininilu akornutissaqartinngilaa, pisiniat pisiarerusutaat aallaavigalugit tuniniaagamik, taama oqarpoq Torrak Fashion-ip tuniniaanermut pisortaa Ghita Whistendahl.
Sisimiuni Politeeq Christina Johnsen isumaqarpoq, meeqqanut iviangeqanngitsunut iviangequtinik tuniniaaneq nittarsaassinerlu ingasappallaartoq...
Pisiffiup atisaarniafiutaani Torrak Fashion-imi tuniniaanermut pisortap Ghita Whitstendahl-ip Christina Johnsen-ip ingasaginninnera paasisinnaanerarpaa, taannalu pillugu assigiinngitsunik isummerfigineqarsinnaasoq, oqarluni.
Uagut niivertarfittut suliffeqarfittullu ilaqutariit pisariaqartitaat nioqqutiginiartarpagut, nioqqutigisarlu pisiariumaneqarluni ujartorneqarpat, nassaariniartarlutigu. Nioqqutigisagut tunisaalluarput, tuniniaaffigisassatullu siunniussagut tassaanngillat niviarsiaqqat arfineq pingasunik ukiullit, tassallutilli niviarsiaqqat aqqaneq marlunniit 16-inut ukiullit, teenagerinik imaluniiit tweenice-nik taaguuteqartinneqartut, maannakkullu niviarsiaqqat ukiuminnut naleqqiullutik siusissukkut iviangequtinik atuisalersarput, Ghita Whistendahl radioaviisimut oqarpoq. Ilaqutariit iluanni nukarliup angajuni assiginiartarpaa ilaarniartarlugulu. Tassa pissusisamisoorpa niviarsiaqqat arfineq pingasunik ukiullit iviangequtinik iviangitut ilusilersukkanik iviangequserneqaraluarpata..?
Tamanna pillugu oqaannarsinnaavunga, pisisartup pisariaqartitaa nioqqutiginiarlugu nioqquteqaratta Ghita Whistendahl oqarpoq. Nioqqutissiat allarpassuit ingasagineqarsinnaasut tuninianngilagut, soorlu trussit g-string-itut ilusillit niviarsiaqqanut tuniniarnavianngilagut tamakku susassarinngilagut, soorlu Christina Johnsen-ip eqqagai..pisisartutta tuniniakkagut isornartoqartippatigit ajusaarutigippatsigillu tuniniassanerigut tuniniassannginerigulluunniit nalilersortussaavarput, Pisiffiup atisaarniarfiutaani Torrak Fashion-imi tuniniaanermi pisortaq Ghita Whistendahl suleqatitsinnut Kim Breinholdt Hansen-imut oqarpoq.
