- Akisunermik, akisoorujussuugamik, SIK-mi akikinnerpaamik aningaasarsiaqarluni akissaatit annikittunnguugamik, Kathrine Kielsen oqarpoq.Assi: KNR / Jørgen Semionsen

Pisisartut Demokraatit akitsuutinut siunnersuutaat pillugu: Akikillipallanniarlik

Nunatta kujataani pisisartut Demokraatit akitsuutinik appaanissamut siunnersuutaat taperserpaat.

Kaffinut, tiinut neqinullu akitsuutit peerneqarnissaat Demokraatit siunnersuutigaat. Partiip mamakujunnut sukkunullu akitsuutinik 2019-imi qaffaanertik aamma peqqissimissutigaat. Nioqqutissanut akitsuutit maanna appaqqikkusuppaat.

Inuit Ataqatigiilli Naleqqallu naalakkersuisoqatigiivisa siunnersuutip pitsaaqutai ajoqutaalu misissoqqaarniarpaat.

Qaqortuni Brugsenimi pisisartut aalajangiissagaluarunik Jens-Frederik Nielsenip (D) siunnersuutaa akuerineqassagaluarpoq.

 

 

- Aap, uanga peerneqarnissaat kissaatigisorujussuuara, Marie Petersen oqarpoq.

- Pissutigalugu ullutsinni isertitagut annikippallaaqaat, qaffanneqarneq ajorput, uanga qaammammusiaqarpunga, angummanniaanaq inuuvugut.

Naalakkersuisoqatigiiusimasut Siumut, Nunatta Qitornai partiilu ikorfartortaasoq Demokraatit 2019-imi akitsuigamik inuit mamakujuttornerannik annikilliinissartik siunertaraat.

Marie Petersenilli mamakujuit akitsornerat iluaqutaasimanngissoraa.

- Naamik suli pinerulerput, uanga taanna malugaara, akitsoraluarmataluunniit taamak ingerlaannarput.

Misissuinerit qatsukkai

Tom Djurhuusip akitsuutit peerneqarnissaat aamma kissaatigaa.

 

 

- Akikillerusunnartaraluarput aamma qitornaqarluni tamakkutortaramik ilaa.

Demokraatit siunnersuutaat Inatsisartuni sapaatip akunnerata siuliani sisamanngornermi siullermeerneqarpoq. Naalakkersuisoqatigiillu aningaasanut naalakkersuisup, Asii Chemnitz Narupip (IA) allannguutissatut siunnersuutaa akuersissutigaat.

Allannguutissatut siunnersuut Naalakkersuisut nioqqutissanut eqqussukkanut akitsuusersuinerup allanngorsinnaaneranik periarfissanik misissuinissaannut tunngavoq. Tamannalu Naalakkersuisut akileraartarnermut akitsuutinullu aaqqissueqqinnissamut pilersaarutaannut atassuteqartinneqassalluni.

Tamanna Tom Djurhuusip uggoraa:

 - Uanga isumaqarpunga misissuikatannginnersut, misissuerpiaannaavillutik pisaramik, aamma tamakkua akissaajaataasarput misissuinerit.

- Ullormiit ullormut akitsorput, aamma ullormiit ullormut akikillineqarsinnaassagaluarput, Tom Djurhuus oqarpoq.

Kathrine Kielsenip nioqqutissat akissarsiakitsunut aamma akisuallaarsorai.

 

 

- Akisunermik, akisoorujussuugamik, SIK-mi akikinnerpaamik aningaasarsiaqarluni akissaatit annikittunnguugamik, Kathrine Kielsen oqarpoq.

Asii Chemnitz Narupip allannguutissatut siunnersuutaa Inatsisartuni partiini naalakkersuisoqatigiittunit akuerineqarpoq. Inuit Ataqatigiit Naleqqallu Naalakkersuisut akitsuutinik allannguinissamut periarfissanik misissueqqaarnissaat akuersissutigaat.

Aningaasanut akileraartarnermut ataatsimiititaliap siunnersuut maanna suliarissavaa, pilersaarutillu malillugit siunnersuut novembarip ulluisa qulingiluaanni aappassaaneerneqassalluni.

Demokraatit siunnersuutaat akuerineqassaguni nersussuup neqaa aserortigaq kiilumut 10 koruunimik akikinnerulersinnaavoq, kaffilu 500 gramiusoq 3 koruunimik akilinnerulersinnaalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat