John Egede aapparminit sianerfigineqarami Brugsenimi nanginik akikillisaqartoq pisinianngittoorsinnaasimanngilaq.Assi: KNR

Pisisartut Black Friday pillugu: - Pisinianngittoorsinnaasimanngilanga

Franskit politikkerii Black Fridayeqartarnerup inerteqqutaalersinneqarnissaanut kaammattuipput - kisianni pisisartut KNR-ip Nuummi Ilulissanilu naapitai tamatumunnga isumaqataanngillat.

Ukiup ulluini niuffaffiunerpaasartut ilaat, Black Friday, nunarsuaq tamaat eqqarsaatigalugu nittartakkakkut aamma pisiniarfinni nioqqutissanik akikillileersuarfiusartoq nunatsinni pisisartunit iluarineqarpoq.

- Akikilliliinerani ekstranik pisiniarnerulluta atorluarlugit, toqqortiterinerulluta akikilliliinerat taakkua atorluarlugit, John Egede, aapparminit Nuummi Brugsenimut akikillisanik pisiniartitaasoq taama oqaluttuarpoq.

- Aappara sianerami Black Fridayimi akikillisat 'nungulerpunngooq', taava pisiniapallaannarpunga, John Egede oqaluttuarpoq.

Ulloq aamma Ilulissani atorluarneqarpoq.

- Uannut isumalerujuuvoq. Ingammik ilinniartuulluni. Tunissutissat eqqarsaatigalugit pisiniartarneq iluaqutitut misigisariga Black Friday eqqarsaatigalugu, Asa-Julia Siegstad, perorsaasutut Ilulissani ilinniartoq oqarpoq.

Pisiniallu ullormik atorluaanerat Nuummi Brugsenimit malugilluarneqarpoq.

- Nuummi Brugseni ullaaq qulingiluanut  ammarmat najuuppunga, inuppassuaqarpoq immaqa 80-it missaaniittut iserlutik pisiniarnissaminnut utaqqisut, Jes Nyborg, Brugsenimi tuniniaanermut pisortaq oqarpoq.

Aamma Brugsenip sinerissami pisiniarfiutaani tamanna malugineqarsinnaavoq.

- Ilaatigu Nanortalimmi. Tasamanimi ippassaq tunisatta amerlaqataanik tunisaqalereersimalerpugut, Jes Nyborg oqarpoq.

Franskit politikkeriisa Black Fridayeqartarneq pinngortitaq illersorniarlugu inerteqqutaalersinniarpaat. Isumaqartoqarpormi neqerooruteqartitsisarnermi atuipilupiluttoqarneratigut tamanna avatangiisinut sunniuteqarnerluttartoq.

AAMMA ATUARUK Franskit politikkeriisa Black Fridayeqartarneq inerteqqutaalersinniaraat

- Isumaqatigivara, kisianni massakkut soorlu Kalaallit Nunaanni akitserinerujussuaq pilerpoq imatut tamatta qanoq isertitaqaraluaruttaluunniit pisiniarsinnaatitaanissarput pisisinnaatitaanissarput pinerullugu isumaqatigivara Black Fridayeqartarnissaa meeraqqortuut isertitakinnerit assigisaallu eqqarsaatigalugit, Aviaja Adolfsen Nuummi Brugsenimi pisiniartoq oqarpoq.

Ilulissanili Asa-Julia Siegstadip silaannaap kissatsikkiartornerata aamma Black Fridayip imminnut ataneqartinneqarsinnaanerat itinerusumik eqqarsaatigisimanngilaa.

- Isumaqarpunga uanga taakkua nammineq aalajangissagaat. Uanga inuiaqatigiittut iluarivara - ingappoq juulleriartornerata nalaani - taamannak pisoqartarnera, Asa-Julia Siegstad oqarpoq.

Brugsenimiillu aamma Black Fridayip atorunnaarsinneqarsinnaanera qularineqarpoq. Taakkuami pisisartutik pillugit Black Fredayeqartitsisarput.

- Isumaqarpunga ineriartorneq unitsikkuminaatsoq, Black Friday-eqanngippat ulloq alla neqeroortitsinissamut atorneqassagaluarpoq. Taamaammat isumaqarpunga franskit politikeriisa ineriartornermik aqutsiniaanerat ajornakusuussasoq, Jes Nyborg oqarpoq.

Ilulissani Butik 56-imi, Asa-Julia Siegstadip juullimi tunissutissaminik qinaasiffigisaani, silaannaap kissatsikkiartornerata Black Fridayillu imminnut ataneqartinneqarsinnaanerat eqqarsaatigineqarsimanngikkallarpoq. Niuertarfilli ilaqutariinnit pigineqartoq pinngortitaq eqqarsaatigalugu allatut iliuuseqarsimasoq pisiniarfimmi sulisup, Finn Geislerip oqaatigaa:

- Allannguinikuuvugut. Puussiaatigut soorlu plastikkit atorunnaarnikuuavugut. Pappilissanik imaattunnguanik atuilernikuuvugut. Taannartaa immaqa kisiat eqqarsaatigaarput, Finn Geislerip puussiaq atulersimasartik takutiutigalugu oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat