Pisisartut: Aningaasanik tigumiaqarnerusalissaagut

Atuisunut akisuutut inuillu aningaasanik tigumiaqarnerulernerannik kinguneqassasoq, pisisartut apersukkatta nalilerpaat:

- Soorunami atuisunut akisuvoq, ullualuinnannguanilu aningaasarpassuarnik isertitsitsissutaareermat takusinnaasariaqaraluarpaat inuppassuit eqqorneqarmata, isumasiukkatta ilaat oqarpoq.

Aperisatta ilaat isumaqarpoq, aningaasanik amerlanerusunik tigumiaqartariaqartalerami mianersornerusariaqalerluni, aningaasivini katannginniassagamiuk imaluunniit tilliffigitinnginniassagami.

Ataaserlu aamma isumaqarpoq, tamanna isornartoqartoq pitsaanerpaajussasorlu Dankorti atornaveersaassallu allatullu ajornartumik aningaasanik tigumiaqarnerusalertariaqarluni.

Grønlandsbankip pisortaata, Jesper Flensted Nielsenip erseqqissaatigaa Dankortit nutaat pissutigalugit taama akiliisitsisarneq atuutitinneqalinngimmat, pisiniarfiilli akiliisitsissutinut tassalu dankortterminalinut atuinerminni aningaaserivinnut akiliisussaanerannik pissuteqarluni.

Pisiniarfiit ukiumut 5.000-it ataallugit akiliisitsissutinik tassalu dankortterminalinik akiliisitsisimasut aningaaserivinnut akiliisussaanngillat.