Pisisartut 23.000-t katillugit 10 millioninik agguagarsisut
Brugsenimit agguagarsiassat tallimanngorpat tiguneqarsinnaalissapput.
Allattoq Mads Pedersen
januaarip 11-at 2017 14:51
Kalaallit Nunaanni Brugsenimi ilaasortat 23.263-t katillugit 10,1 millionit koruuninik agguagarsissapput. Tamanna tallimanngorpat januaarip 13-ani 2017-mi pissaaq. Kalaallit Nunaanni Brugseni tusagassiuutinut taama allaaserisaqarpoq.
- Ilaasortanik nutaanik arlalinnik takkuttoqarsimavoq, pisiniartartugullu amerlisimallutik. Tamanna tunngavigalugu nunatsinni inuiaqatigiinnut aningaasaliiniikkut nutarsaanikkullu tunniusseeqqissinnaalluta.
- Kingullertigut pisiniarfimmik nutaamik Qinngutsinni ammaanikuuvugut. Takorluukkatsinniik ajunnginnerujussuarmik ingerlasumik. Ukiumut pereersumut qujarusuppugut pisiniarfitsinnilu takoqqinnissarsi qilanaaraarput, Kalaallit Nunaanni Brugseni allappoq.
