Pisiortupiloornissamut suli pissutissaqanngilaq

Uivernissamut pissutissaqanngitsoq, Brugsenip nuna tamakkerlugu pisiassanik pissarsiniartartua Finn Christensen oqarpoq. Tassalu suli naammattunik pisiassaateqarlutik erseqqissarlugu.

- Pisiassat timisartukkut tikisittakkavut immikkuullarissuupput, ajortiasuullutik. Taakkualu timmisartut uninngatillugit pinngitsoortariaqarpagut. Kisianni umiarsuaqaqqammerpoq sapaatillu akunerisa tulliani aamma allamik tikittoqassalluni, Finn Christensen oqarpoq.

Timmisartornissaq inerteqqutigineqalermat, pisiassanik nunatsinnut nassiussassanik Kalaallit Nunaanni Brugsenit unitsitsisariaqarsimapput.

- Qallersuutissat, nunatsinnut immikkut tunisassiarineqartartut, unitsittariaqarsimavagut, Finn Christensen oqarpoq.

Timmisartornissaq inerteqqutigineqarunnaarpat aatsaat pisiassanik nutaanik aserujasunik, Kalaallit Nunaanni Brugsenit immikkut tunisassiaritittagaannik, tunisassiortoqaqqilissaaq.

Tassalu paarnanik nutaanik Danmarkimiit ulluni makkunani pissarsisinnaanngillat, aamma qallersuutissanik nutaanik tikisitsisinnaanngikkallarlutik.

Kisianni sapaatit akunneri tamaasa umiarsuaqartarmat nutaanik naatitaqartuassaaq, soorlu naatsiianik, uanitsunik, guleruujunik aamma kinakålinik, Finn Christensen neriorsuivoq.

Kisiannili timmisartornissaq inerteqqutaaginnarpat, paarnat ajortiasut qallersuutissallu amigaataalersinnaasut Finn Christensen oqarpoq.

Sanami Nuna tamakkerlugu nakorsaataasivimmiit aamma oqaatigineqarpoq, nakorsaatinik naammattunik sisamanngornerup tungaanuugallartoq pissaqarallarlutik.