Pisinnaatitaaffiit aqqutissiuunneqassapput
Inuiattut pisinnaatitaafii pillugit suleqatigiissitaliartaami nunatsinni inuiattut qanoq pisinnaatitaaffeqassanerluta misissussavaat.
Suleqatigiissitaliartaap misissuereeruni nalunaarusiarissavaa kalaallit inuiaat nammineersinnaasusiat qanoq isikkoqassanersoq.
Inuiaat pisinnaatitaafii pillugit FN-ip inatsisaa malillugu nunarput pisinnaatitaaffilerneqassanersoq kiisalu Danmarkip tunngaviusumik inatsisaanut sanilliullugu nunarput pisinnaatitaaffilerneqarpat qanoq inissisimassanersoq qulaajaneqassaaq.
Suleqatigiissitaliap pilersinniarnerani isumalioqatigiissitaliami oqallisingaatsiartoqarsimasoq siulittaasunngortoq Lars-Emil Johansen oqarpoq.
Isumalioqatigiisitap suliassarinngilaa nunatta namminersulivinnissaa, illuatungeriinnili isumaqatigiissutaavoq, isumalioqatigiissitap pisinnaatitaaffissaq pillugu suliaa mattussisuussanngitsoq Kalaallit Nunaata namminersulivinnissaanut, namminersulivinnissamullu akornutaasumik siunnersuusiortoqassanngitsoq.
Isumalioqatigiissitami Danmarkimit ilaasortat kissaatigineruaat tunngaviusumik inatsisimmi paragrafip 19-iat najoqqutarineqassasoq nunarput namminersulivinniarluni pisinnaatitaaffeqassappat.
Tunngaviusumik inatsisisip §19-ani pineqarpoq Folketingimi akuersissutigineqaqqaartariaqartoq nalagaaffeqatigiinnermi suleqatiginneq taamaatinneqassappat.
Kalaallit Nunaat namminersulivinniarluni kissaateqalissagaluarpat, isumaqatigiinniatoqarlunilu anguniarneqassappat, paragaraf 19-ni atorneqassasoq, suleqatigiissitaliap siulittaasua Lars-Emil Johansen oqarpoq.
Namminersorneq pillugu ataatsimoortumik isumalioqatigiissitap siulittaasuata Kalistat Lundip ataatsimiinneq naammassisoq naammagisimaarpaa, illuatungeriit akaareqatigiillutik oqallissimanerarlugit. Isumalioqatigiissitaq tulliani Københavnimi juunimi ataatsimiissaaq.
